uMthunywa
SIZWILE ukuthi izintombi zakudala zaziwuthanda umbuso wasemkulwini lapho ezazitshona zizidlela inyama enonileyo yesifuba, ukanethwa. Ezalamuhla izintombi ziyakwala konke lokho zikukhafulele khatshana zisithi zona kazizalelwanga ukudla. Intombi zalamuhla aziwahloniphi amadoda ngoba imbongi ithi intombi zalamuhla ngezinye.
Ngalokhu imbongi itsho ukuthi zehlukile kwezezolo ezazihlonipha amadoda.
Lezi ezalamuhla kuthiwa zikutshela konke ndoda okutsho ukuthi ziyeyisa indoda ziyithethise ziyitshela amagama amabi. Ziyamisana lendoda izintombi zalamuhla okwakungenziwa ngezezolo ezazizithoba phambi kwamadoda.
Ezalamuhla intombi ziyitshela izikhihli zenhlamba ezinjengokuyitshela ngeyakudla mnyakana wendlala.
Kulomthetho eziwulandelayo mayelana lokwenda izintombi zalamuhla.
Zivulela indoda utshaphutha 37, lo ongumthetho ozinika amandla ekwendeni zona ntombi zalamuhla.
Kulamalungelo izintombi zalamuhla eziwathola kutshaphutha 37 lowo. Izintombi zezolo zazingelawo amalungelo anjengalawo asenikwe ezalamuhla. Izintombi zalamuhla nxa sezivulele indoda lowo tshaphutha 37 iphelelwa ngamandla ithithibale inikine ikhanda kuphela kungelanto engayenza. Iyehluleka lokukhuluma, nanku phela imbongi ithi, “Umlomo utsha amathe.”
Nxa indoda isitshelwe ngotshaphutha 37 iyafulathela leyontombi yalamuhla ilengise umlomo lamakhala sababhemi odakwe zinsipho. Imbongi igcizelele lokhu ngathi, “Uyadlala ngezintombi zalamuhla.” Imbongi iyawazisa amadoda ukuthi lezi sokungezinye insuku, izinto seziguqukile. Sezedlule lezo nsuku lapho indoda ibibusa ngomzaca lenduku.
Bebetshaywa ngenduku lemizaca omama ngensuku zezolo. Utshaphutha 37 sekuyiyo nduku ebhokoda amadoda lamadodana.
Lokhu kuveza sobala ukuthi umthetho lo osukhona usuwanqobile amadoda. Abaselamvumo yokuhlukuluza betshaya omama bengabiseli. Sekunje amadoda sekuwehlula atshiye imizi kunye labantwabayo. Bakhetha ukuba zinkedama (intandane) zomango behamba ngeganga. Sebetshiye imizi yabo amadoda abayimihambuma yezitalada ngoba bengasela ndawo eziqondileyo zokuhlala. Benjalo nje balengise imilomo echachambayo okuyikuthi bahamba lezitalada nje balambile badla ingqweqwe zomlomo.
Phansi lapha anyathela ngenyawo ezilemikenke okutsho ukuthi zidabukile inyawo zabo kambe zingasagezwa kuhle umuntu etshona ehamba kungacaci lapha ayakhona. Izintombi zalamuhla kazihlalanga phezu kwezandla. Ziyifuna ngamandla inkundla yokukhanda lokubumba imithetho. Ngamanye amazwi izintombi zalamuhla zifuna ukufunda lazo zibe ngamagqwetha labomantshi, zenelisa ukukhanda njalo zibumbe imithetho.
Kazifuni lokho okwakuthakazelelwa zintombi zezolo ukutshona zisidla emkulwini njalo zisatshelwa amajwabu engcuba, inkomo ezizifeleyo. Izintombi zalamuhla zilangathela ukuba sesihlalweni eside sobungqongqoshi lapho ezithi qotshotsho khona zihlahlula amacala alukhuni.
