uMthunywa
Ugwalo – Ugqozi Lwezimbongi
Ziqoqwe zahlelwa nguP Mpofu
Ludindwe yiMambo Press ibambene leThe Literature Bureau
Imbongi nguS Siwela
Isihloko senkondlo – Ubuthongo
Ubuthongo yinto esiyijayeleyo sonke. Imbongi isitshela ukuthi ubuthongo bulobumnandi lobubi. Abantu ubuthongo bayabamkela ntambama ngoba imini isibadinile. Abantu batshona besebenza imini yonke kuthi nxa sekufika intambama sebedinga ukuphumula ngokulala sebebanjwe yibuthongo. Imbongi ithi ingena engutsheni iyabunxusa ubuthongo kodwa bungabuyi.
Siyatshelwa ukuthi ubuthongo buyisimanga ngoba benza umuntu afe kodwa esaphila. Umuntu nxa elele ingqondo iyalala ingaze yezwa lutho kuze kufike ukuthi aphaphame. Ubuthongo behlela umuntu engabunxusanga. “Buthong’uyisimanga, Wenz’umunt’afe esaphila. Wen’uzifikela lokulala. Wen’ ungumabuy’ enganxuswanga.” Nxa sebufikile ubuthongo umuntu uhle alale. Bufika bunganxuswanga muntu yibuthongo lobo.
Bumnandi ubuthongo okokuthi benza amavila ande kubo ngoba vele engafuni ukuyasebenza. Nxa bungawabamba amavila ahle alale angaze avuka ephika ngabo ubuthongo. Izikhuthali zona ngakwelinye icele nxa zisizwa ubuthongo zikhalela imini ukuze zivuke ziyesebenza hatshi ukutshonela ukulala. Ubuthongo abufiki bodwa emuntwini kodwa imbongi ithi bufika lomzawakho uphupho. Ilenzasamuntu iphupho leli nxa ethi lingumzawakhe kabuthongo.
Iphupho leli yilo elingezelela ubunandi kubuthongo. Umuntu nxa elale waze waphupha uyabezizwa elele obumnandi ubuthongo. Ubuthongo lobu lanxa kuthiwa bumnandi, kodwa kulobubi obuhamba labo. Nxa buhlasela abantu amasela ayathaba ngoba ezahlasela kuhle abantu belele. Iyabuza kubuthongo imbongi ukuthi kuhlasela abalungileyo bodwa, kanti izigebengu lamasela-ke? Siyakwazi ukuthi amasela lezigebengu ahlasela kuhle nxa abantu bejunywe yibuthongo yikho imbongi isithi amasela ayathaba nxa abntu bezunywa yibuthongo.
Ubuthongo kuthiwa isisebenzi kabusithathi mango, okutsho ukuthi siphanga sijumeke ngoba sidiniwe. Umfundi laye bumthiyisa inhlanzi emanzini okutsho ukuthi uthi efunda bumjume ubuthongo abengothiya inhlanzi encwadini azifundayo ngoba eselele aze aphuphe.
