uMthunywa
Silo Charles Dube
Imbongi kulinkondlo ikhuluma ngesithandwa sayo esithanda kakhulu okwenza izizwe angani isihlanya, isiphambene ingqondo. Ngenxa yothando imbongi ithi yakhangela ngapha langapha kayaze yabonisisa ngoba ithi yabona buvilibana. Ngalokho imbongi yacabanga ukuthi hlezi kayiphilanga isigula. Yazincweba izama ukuzwisisa ukuthi kambe iyaphila kumbe iyaphupha. Yathola ukuba kayihlanyi njalo kayiphuphi kumbe isanganiswa yibuhle besithandwa sayo esibiza ithi yisiponono sayo.
Ngenxa yokukhumbula lesi sithandwa sayo esihle imbongi yehluleka ukulala ebusuku yakhangela yikho nje ithi kwasa ebusuku kwathi emini lacitsha ilanga ngoba ubuhle besithandwa sayo sebuyiphambanise ingqondo ingasaboni kahle. Uthando alalo ngesithandwa sakhe lwamtshayisa ngovalo waphelelwa lulwazi, waswela ukuthi enzeni, kuhlangene imizwa embalwa kuye. Isebenzisa imbuzo engadingimpendulo itshengisa ukuthi uthando lulokwenza bani kuye.
“Ngitshopoke? Ngitshakale? Ngiqolotshe na?” Kayiqedisisi imbongi ukuthi yini okwenzakala kuyo ngenxa yothando ibisivumelana lalabo abathi uthando luyahlanyisa njalo lwenza lomuntu oligwala abelesibindi.
Luyamfuqa uthando umuntu oligwala enze obekungakhunjulelwa ukuba angakwenza. Iyaphambili imbongi isiveza ubuhle besithandwa sayo lobo obuyihlanyisayo. Sihle isithandwa sayo imbongi ize ithi uMvelinqangi (uNkulunkulu) wasidala ethabile.
Amabele alesi sithandwa sembongi akhanya abunjwe kuhle yikho nje imbongi isithi kungathi yimikhemeswana ebumbekileyo. Lokhu kungabe kusitsho ukuthi azindingilizi ezibumbekileyo ngoba imikhemeswana izindingilizi ezibumbekileyo. Ukhalo lalo luncinyane luhle luze lufaniswe loluka lonyovu. Isithandwa sembongi lesi kuthiwa simnyama kodwa lanxa kunjalo kodwa sihle. Isuthisekile ngobuhle besithandwa sayo imbongi ize ibunikele kuZulu ukuthi ayitshengise ubuhle obunqoba obesithandwa sayo. Iyagcizelela imbongi ukuthi sihle isithandwa sayo okugxozisa indenda.
Ngobuhle obukhulu besithandwa sayo lesi imbongi iyabuza ukuthi nga ingubani yona engenqotshwe yiso leso sithandwa njengoba ingasi sithombe sona esingela mizwa. Njalo kasimbongolo enxahileyo okokuthi ayilamizwa.
Ukuqomisa akuqali ngaye ngoba zala abantu ziye bantwini, okutsho ukuthi ukuthandwa kwakhe kutsho ukwaliwa komunye. Iyasibiza-ke imbongi isithandwa sayo ukuthi sisondele eduze asiphathe asange ezwe ubunandi. Iyacela ukuthi isithandwa sayo siyiwolele ezandleni sazo.
Iyaqinisa imbongi ukuthi isithandwa sayo yiso sodwa, isitekulisa ngokuthi, “Nguwe wedwa Dudu wami wena somoya wami.” Siyathandeka lesi sithandwa sembongi ngoba usomoya kutsho ukuthi singuyise womoya wakhe.
