uMthunywa
YiNtatheli kaMthunywa
LOBA sekulengqubekela phambili kumidlalo yokugijima ezikolo, ingcitshi kwezokuqeqetshwa kwemidlalo le zibika ukuthi kunengi okusamele kufundwe ngababalisi.
UPhakamile Lisimati, ongumqondisi wezokuqeqetsha kunhlanganiso yeNational Athletics Association of Zimbabwe (NAAZ) uthe kuyayangisa ukuthola ababalisi begijimisa abantwana ngendlela engayisiyo.
Ngemva kokuhlolisisa indlela izikolo ezilolonga ngayo, iNAAZ iveze ukudana njalo isiqale ukufundisa ababalisi kakutsha.
Kulumnyaka uPhakamile ukhangelelwe ukuthi afundise ababalisi bomdlalo wokugijima encedisana lenhlanganiso yeBulawayo Athletics Board.
“Inengi lababalisi alazi lutho ngokuguquka komdlalo we-athletics. Lokhu sakubona kumincintiswano eminengi.
Umdlalo we-athletics uqala ezikolo ngakho ababalisi kumele bafundiswe ngokugcweleyo. Umdlalo uyatshintsha lemithetho isiyehlukile kuleyakudala. Kubalulekile ukuthi silungisise indlela ababalisi abalolonga ngayo ithalenta elincinyane,” kutsho ULisimati.
Umqeqetshi lo uthe uzancediswa nguJerry Shumba ovela enkabazwe laye olembali yokufundisa ngezokugijima.
Kumbiko othunyelwe iphephandaba likazulu, umgcinisihlalo weBAB uManuel Mpofu uthe bahlose ukufundisa ababalisi abangaphansi kwezinhlanganiso zabaphathi bezikolo ze-Primary (iNaph) leze-Secondary (iNash).
“Ababalisi kumele bathole izithupha zaphezulu, yikho nje siqala ukuthi sifundisane nge-athletics. Sikhangelele ukuthi kuze abantu abanengi, hatshi ababalisi kuphela.”
“IBAB ikhuthaza ukuthi izikolo zithumele ababalisi bazo kuzifundo zomdlalo. Kuzakuba lamanye amakhosi njalo lapho esizafundisa ngemthetho yomdlalo ehlala itshintsha njalonje.”
