uMthunywa
Umtshado uyisibusiso esikhulu esivela kuNkulunkulu. Ezikhathini ezinengi nxa kutshadwa abadala baba lenjabulo enkulu ngoba besazi ukubana umtshado uyavikela abantwana lonkosikazi ekuthathelweni amalungelo abo.
Umtshado ofana lo Marriage Act chapter 5:11 uyavikela abantwana endabeni zelifa njalo abazali balakho ukubana bathathele abantwana izincwadi zokuzalwa kanye lamapasipoti.
Umama loba ubaba ulakho ukukwenza konke okuqakathekileyo uma elesithupha somunye wakhe lesakhe.
Nxa kulesithupha somtshado omunye umzali ulakho ukubana abhale i-affidavit nxa ezathi ukuyangaphandle kwelizwe lomntwana njalo ulakho ukukhulula umntwana ukubana ahambe ngohambo lwesikolo. Lokhu kuveza sobala ukubana umtshado uqakathekile njalo kumele ubemdala kulabantwana ukuze abadala banelise ukuthathela incwadi yokuzalwa kungela nkathazo.
Nxa umntwana ezelwe abazali bengakatshadi akathatheleki incwadi yokuzalwa kusetshenziswa isithupha somtshado. Kumele abazali babekhona bobabili ukuze basayine okuthiwa ngama-paternity forms.
Kulezinsuku sokusuka kube kubi ngoba indaba zokuchitheka kwemitshado seziwathethe amalungelo labantwana.
Abazali abaselakho ukuthatha izinqumo ngabantwana ngoba izikhathi ezinengi ekwahlukaneni abazali basuka baqonde endaweni ezitshiyeneyo lezincwadi zabo ezigoqela izithupha .
Kule iviki ngithole ithuba lokuxoxisana lomama okuthiwa nguKhethiwe. UKhethiwe wayetshade loNqobani ngokusemthethweni ngomtshado okuthiwa nguChapter 5:11 ngomnyaka ka2008.
Babusiswa ngabantwana abathathu. Ababili babathathisa incwadi zokuzalwa kodwa owesithathu kathathelwanga ngoba ubaba wasuka wephula umthetho wacina esevalelwa enkantolo wagwetshwa iminyaka emithathu. Walinda-ke uKhethiwe elindele umkakhe kodwa ekuphumeni kwakhe enkantolo wasuka wangasaphenduki endlini yabo loKhethiwe, wahamba waphulula. Zatshova insuku umntwana waze waba sesibangeni sokuya esikolo kodwa-ke kwasuka kwabanzima ngoba engelayo incwadi yokuzalwa. Weza-ke eTrinity Project ezodinga uncedo.
Okokuqala samcebisa ngokubana kumele abe le-birth confirmation record, i-health card, incwadi yomtshado, isithupha sakhe kanye lesomkakhe. Inkinga eyaba khona yikubana uKhethiwe wayengelaso isithupha somkakhe, lokhu-ke kwadala ukubana bamalele ukubana athathele ingane yakhe incwadi yokuzalwa. Ngiloba nje lanamhlanje umntwana lokhu engelayo incwadi yokuzalwa ngenxa yokubana ubaba kaziwa ukuthi ungaphi njalo lezihlobo kazikwazi ukuthi ungaphi. Kumqoka-ke ukuthi nxa uzahamba utshiye isithupha sakho kanye lesomtshado ukwenzela ukuba umkakho asale esenelisa ukunakekela abantwana abathathele incwadi zokuzalwa.
Kasisebenziseni amaphasipothi kuphela sitshiyele imuli izithupha. Lokhu njalo kuyaveza sobala ukubana kuqakathekile ukuthi nxa abantu besehlukana kabakwenze kube semthethweni njalo bathole lencwadi yokwehlukana (divorce certificate). Lokhu kwenzelwa ukubana kubelula ukuthi umzali onguye osele egcina abantwana anelise ukubana abaphe amalungelo abo afana lawokwaziwa. Umtshado yisibusiso kodwa uphinda ube mubi nxa sekusehlukana abazali ngoba kuthathela abantwana amalungelo abo .
Bazali kasihlaleni sikhumbula izingane zethu lapho sesichitha imitshado yethu ukuze basale besenelisa ukuthi bathole incwadi zabo zokuzalwa kanye lamalungelo abo.
Kasihlanganeni njalo kuviki elizayo.
Umlobi utholakala kukheli ethi [email protected] loba kunombolo ezithi 0773 195 055
