uMthunywa
Nkosilathi Sibanda
UKIRSTY ‘MaSiziba’ Coventry uyidinga phansi phezulu imali yokuthi amaqembu esizwe aqhube inhlelo zayo ngomnyaka ozayo.
Inyathelo likaCoventry liza ngesikhathi ilizwe likhangelane lokuwa komkhonomi osekwenze amaqembu ezemidlalo ehluleke ukuphatheka kumincintiswano lamanye amazwe.
Umphathintambo wezemidlalo lo uyazi ukuba imali ephiwe ugatsha lwakhe kubhajethi yelizwe ayeneli, okuyikhona okumfuqele ekuthini abike ukuba usedinga imali lakumankampani azimele wodwa.
UCoventry uthe ugatsha lwakhe sekubambana lamankampani azimisele ukuncedisa loba yiliphi iqembu lemidlalo.
“Sizimisele ukuthi sibambisane lamankampani lamalunga womphakathi angenelisa ukuthi sihlanganise imali lalokho esilakho. Amaqembu wonke amela isizwe kumele athole usizo olwaneleyo,” kutsho lumphathintambo owaziwa kakhulu ngokuthola igolide ngokubhukutsha kuma-Olympics.
Kusenjalo, abadlali abakasde bemele isizwe kumidlalo yabasakhulayo eyeAfrican Union Region 5 Under 20 sebephendukile ekhaya.
Kulummncintiswano ohlanganisa amazwe akumhlubulo ongezansi yelizwe, iZimbabwe iqede ukunombolo yesihlanu ngemva kokuthumela abadlali abangamatshumi ayisithupha lantathu kumaqembu emidlalo yokugijima, inguqu yamantombazana, ukuqaga, ithenisi, lokubhukutsha kuphela.
Isizwe sithole imendulo ezingamatshumi amahlanu lanye ezibalisa amagolide ayisitshiya galolunye, isiliva esilitshumi lantathu lamathusi angamatshumi amabili lasitshiya galolunye.
Njengenhlalayenza, iSouth Africa iphethe inqobe zonke ilemendulo ezingamatshumi ayisikhombisa kulamagolide alitshumi lanhlanu.
