uMthunywa
YiNtatheli kaMthunywa
NGENXA yokwanda kwembiko yokuhlukuluzwa kwabesifazana kulosiyazi osesungule ulunyoka lwedwala oludala ukuthi owesilisa ehluleke ukuhlangana lowesifazana ngoba eledwala elivala isitho sakhe, uMthunywa ukuzwile lokhu.
Usiyazi lo, uMnumzana Eddington Virimayi owaziwa ngokuthi nguSaManyika owake waduma ngokukhiya abathetheneyo usungule ulunyoka lwedwala wathi walusungula ngenhloso yokuvikela abantwana abangamantombazana kanye lokuqinisa imizi yabathetheneyo.
“Ngananzelela ukuthi abantwana abangamantombazana bayahlukuluzwa ngabesilisa ngokubabhinya kanye lokulala labo bethi nxa sebezithwele baphike imithwalo. Ngalokhu ngibone kungcono ukuthi ngisungule ulunyoka lolu ngoba lwenza ukuthi indoda nxa izama ukuhlangana lentombazana elalo kwale ukuthi behlangane ngoba kuba ledwala elivala isitho sakhe.
“Okunye njalo nginanzelele ukuthi ulunyoka lolu luyaqinisa imizi ngoba ungalufaka umuntu oyendileyo indoda engasoyakhe nxa ifuna ukuhlangana laye kuyehlula ngoba ithola kulidwala okuyikho okuvikela abantu emkhuhlaneni etshiyeneyo ethelelwana emacansini ngoba kuyabe sokwehlule ukuthi bahlangane,” kutsho uSaManyika.
USaManyika ubuye wathi sebebanengi abantu asebenzele ulunyoka lolu njalo bayambonga.
“Mina sengilungisele abantu abanengi ulunyoka lolu njalo bayaluncoma ngoba kalugulisi muntu njengalolu esihlala sisizwa ngalo olubulalayo,” kutsho uMnu Varimayi.
Ekhuluma lentatheli uNkosazana Esnat Mangonya uthe uyawuncoma umsebenzi owenziwa nguVarimayi ngoba uvikela abantwana engozini njalo uqinisa imizi yabantu.
“Mina ngiyawubonga kakhulu umsebenzi lo oyenziwa nguVirimayi ngoba uvikela abantwana engozini zokuzithwala njengoba amadoda amanengi kulezinsuku esehlangana labantwana okokuzikholisisa kuphela kodwa engasoze ebathathe. Lokhu kuyingozi enkulu kakhulu ngoba kungenzeka umntwana azithwale indoda yakhona yale ukuthi yiyo edale lokhu.
“Okunye njalo ulunyoka lolu lusiza ngokuthi luqinisa imizi yabantu ngoba umfazi olalo uyehluleka ukuhlangana lowesilisa ngoba isitho sakhe siyabe sivalekile lubuye luncede njalo ekuthini owesifazana olalo engabhinyeki njengoba isitho sakhe siyabe sivalekile. Ngalokhu ulunyoka lolu luyinto enhle kakhulu,” kuphetha uNkszn Magonya.
