uMthunywa
Nkosilathi Sibanda
IQEMBU likaTonderai Ndiraya kukhanya selikhule ikhanda ngokuswela iqembu elingalinqoba kumkhankaso weCastle Lager kumidlalo elitshumi lanye.
Kumdlalo olandelayo mhlawumbe inhlanhla yeNgezi Platinum ingaqedwa yiBulawayo City eqeqetshwa nguAmin Soma Phiri.
Zombili ziyaqala ukudibana kulisizini loba nje abaqeqetshi besazi ukuthi nguphi phakathi kwabo oqine ukwedlula omunye.
UPhiri usacathula kuMakhosi nanko lumdlalo ngowesibili lokhe waqhatshwa ngokuxotshwa kukaDarlington Dodo kuqembu lekhansili yakoBulawayo.
Ukuze uPhiri athole inhlonipho kumele anqobe uNdiraya, ayimise ibhasi yalithimu esifuna ukubaleka lenkezo. Kodwa, isimo selogu sivumela ukuthi uPhiri anqotshwe. Iqembu leBulawayo City lihleli kunombolo ezwisa ubuhlungu ngemiklomelo elitshumi kuphela. INgezi Platinum iyahlekelela phezulu ngemiklomelo engamatshumi amabili lasitshiya galolunye.
Nxa izifiso zikaPhiri zingagcwaliseka, iqembu lakhe lilakho ukuthi lithabise abalandeli bamanye amaqembu asebedinge baswela iqhinga lokubamba iNgezi Platinum.
Kusenjalo, kweminye imidlalo, iHighlanders ibiza iCaps United Emagumeni. Amanye amaqembu akulumhlubulo, iChicken Inn isekhaya leHarare City. IBulawayo Chiefs izasekela indlela iqonde kuNichrut ngoMgqibelo.
Imidlalo yeCastle Lager yeviki lesi-12 iphelele:
NgoMgqibelo: Nichrut v Bulawayo Chiefs (Ascot), Chicken Inn v Harare City (Luveve), Ngezi Platinum v Bulawayo City (Baobab), ZPC Kariba v Yadah (Nyamunga)
NgeSonto: Highlanders v Caps United (Barbourfields), Shabanie Mine v Chapungu ( Maglas), Dynamos v FC Platinum (Rufaro), Triangle v Black Rhinos (Gibbo), Mutare City v Herentals (Vengere)
