uMthunywa
YiNtatheli kaMthunywa
KULOJAHA osakhulayo wesigabeni sakoChirumhanzu othi wakhanzingwa unyawo ngemva kokuba yena labangane bakhe betshontshe amabhanana kwesinye isivande okwacina kubangela ukuthi abe yisigoga.
UKudzanai Mundure oleminyaka yokuzalwa engu-23 ohlala ngaphansi kukasobhuku uMhondiwa ngaphansi kwenduna uBangure uthe ngenyanga kaNcwabakazi ngomnyaka ka2013 ngesikhathi betshaya izitina labangane bakhe abathathu ebusuku inyanga ikhanyisile wakhokhelwa ngabanye bakhe bayatshontsha amabhanana amanengi esivandeni senye indoda.
“Amadoda amane la, engangitshaya lawo izitina ayizihlobo zomnikazi wamabhanana yiwo athi asambeni esivandeni sikababa siyothatha amabhanana sidle sisebenza.
“Abanye bami babegqoke izicathulo mina kodwa ngangingagqokanga okuyikho okwabangela ukuthi ngicine ngicutshwe unyawo lwayalungiswa ngaqala ukubulawa zinyawo,” utsho njalo.
Uthe ngesikhathi besiyathatha amabhanana la, wayebona angathi bayathatha amabhanana kayise wamadoda la, amathathu engazi ukuthi kwakuyikutshontsha.
UKudzanai uthe umntwana ohlala lapho ababetshontshe khona amabhanana wafika ngakibo wabika ukuthi usecutshwe unyawo njalo bafuna ukuyalulungisa.
“Ngalelolanga mina ngasengidle amabhanana amane kuphela, amanengi athathwa ngamadoda la emuli yinye. Umntwana lo wemulini yamabhanana waphinda njalo waya emzini kasobhuku wayakhuluma into efanayo ukuthi ngicutshwe unyawo. Lokhu kwabangela ukuthi usobhuku angibize wangibuza ukuthi kuliqiniso yini ngavuma njalo ngaveza ukuthi sakha ingatsha ezintathu kodwa mina ngadla amabhanana amane nje kuphela,” utsho njalo.
UKudzanai uthi umbiko lo wafika kubazali bakhe usithi inhlabathi ecutshiweyo ifakwe phakathi kwephepha lefulawa yayagcinwa ezihlahleni zamabhanana kulindelwe ukuthi iyokhanzingwa lemithi yenyanga.
Kubikwa inhlabathi le yathathwa yayalungiswa koChihota kodwa abanye bathi yalungiswa eBuhera okwabangela ukuthi ujaha lo aqalise ukubulawa zinyawo wacina engasenelisi ukuhamba inyawo sezigogekile.
“Usobhuku wabiza ubaba esamtshontshela amabhanana ongukhulu wami ngoba sihlezi ndawonye. Ngacela uxolo wavuma ukuthi wakhuleka ephethe inhlabathi ayeyicuphile okuyikho athi kwabangela ukugula kwami. Wathi uzangilungisa ngemva kokukhulunywa kwendaba le,” utshonjalo uKudzanai.
UNkosikazi womnikazi wesivande wavuma ukuthi nguye owacupha unyawo njalo wagcina inhlabathi engakahambi ukuyayilungisisa.
Unkosikazi lo kubikwa wavuma ukuthi nguye owathatha unyawo wahamba lalo kibo lapho okulonina omdala okubikwa uyingcitshi ekukhanzingeni inyawo zabantu okucina kubangela inhlupho ezehlukeneyo kulabo abayabe bekhanzingwe inyawo.
“Ujaha lo uthi ngomnyaka ka2014 uhlupho lolu lwaqhubeka lusiyaphambili unyawo lwakhe lwesandleni senxele lwacina seluphela amandla.
“Umnikazi wamabhanana wacina esiya emapholiseni eChizhou Base ukuyabika ngokutshontshelwa amabhanana sabhadaliswa ama$40 ngamunye waphiwa i$160. Ngaleso sikhathi ngangivele ngingasahambi ngathwalwa ngenqola ngisiwa emapholiseni,” utshonjalo uKudzanai.
Uthe abazali bakhe bacela kumnikazi wamabhanana ukuthi amlungise njengoba basebebhadele imali yakhe njalo wathembisa ukuthi uzamlungisa.
“Akukho okwatshintshanayo lanxa undoda lo wayesethembise ukuthi ngizaphinda ngihambe kodwa kuze kube lamhlanje angihambi. Ngacina ngitshiya isikolo sengiku fomu 3 ngenxa yokugogeka. Abazali bami bathengisa inkomo ezintathu befuna ukungelaphisa komunye umphurofethi weMasvingo owayesithi uyenelisa ukungelapha kodwa kwehlula,” utshonjalo.
USobhuku Tamai walapho okuhlala undoda lo owatshontshelwa amabhanana kubikwa wake wabambisana losobhuku uMhondiwa ukuze kulungisiswe indaba le kodwa kwehlula.
Isikhulumi samapholisa eNkabazwe uInspector Joel Goko uthe ufuna isikhathi sokuchwayisisa ngendaba le ukuze abekwazi ukuba amapholisa akhulumisana labantu laba sebekusiphi isigaba.
USobhuku Mhondiwa uMnumzana Tichaona Mundure ufakazile indaba yokugogeka kukaKudzanai.
“Njengoba etshilo sahlala amadale amanengi ngenxa yendaba le njalo bavuma lomkakhe ukuthi bamcupha unyawo bayakhanzinga inhlabathi yakhona.
“Imuli yangakibo kaKudzanai yabhadala kulesithembiso sokuthi umntanabo uzaphinda ahambe kodwa kuze kube lamhlanje kahambi. Kungakho sesidinga uncedo kuzulu wakuleli,” kutsho usobhuku uMhondiwa.
