uMthunywa
YiNtatheli kaMthunywa
KULENDODA yeNkayi efunge yagomela ukuthi ngeke iphinde ingenise umakhwapheni endlini yayo kulandela ukudonswa amaphambili ngumkayo ngemva kokukhandwa ilomakhwapheni.
UMnumzana Bekezelani Dube uficwe ngumkakhe uNkosazana Elina Sibindi elomakhwapheni endlini yabo yokulala okuyikho okubangele ukuthi amhlasele.
UNkosazana Sibekiwe Ndlovu owakule indawo uveze ukuthi isenzo sikaDube sabangela ukungazwisisani.
“Kukhanya uMaSibindi udletshana wayevele eseluzwile esalinde kuphela ukuthi azibonele ngawakhe. Wabikela umkakhe ukuthi ufuna ukuyavakatsha koyisekazi bucwadlana lomuzi wabo yena esazi akuthiyileyo.
“Kuthe ilanga lisiya ngomtsha wendoda umkakhe wayesethintane lomakhwapheni wakhe kumakhalekhukhwini embikela ukuthi unkosikazi wakhe uvakatshile kanti kabuzanga elangeni.
“Kuthe phakathi kwamabili umkakhe wathutsha endlini wafica umkakhe epheka kuluthuli umakhwapheni ecambalele embhedeni egqoke isudu yokuzalwa,” kubika uNkszn Ndlovu.
Uqhubekele phambili eveza ukuba uMaSibindi ebona umkakhe epheka wamangala kukanti indoda yona yahle yaphaphatheka yaya endlini yokulala lapho okwakulomakhwapheni kanti lomkakhe umhlezi izithende.
“UMaSibindi nguye owahle waqala ukungena endlini yokulala wafica umakhwapheni womkakhe ecambalele embhedeni.
“UMaSibindi wahwatsha imvubu ayeyifihlile wabhaxabula umakhwapheni laye owaphuma esephaphatheka elokhu ebhunyumunyu kodwa esephethe impahla zakhe,” kulandisa uNkszn Ndlovu.
Ekhuluma lentatheli uNkszn Sibindi uvumile ukuthi wakhanda umkakhe eledlalicatsha.
“Abantu ngothathawese sebefikise indaba enjalo kini abezindaba. Kungasenani ngangifundisa umkami umthetho ukuthi kumele akwazi akufunayo. Ngangihlala ngikhala inyembezi kwamanye amalanga engabuyi ekhaya abuye ekuseni nxa ngimbuza engazwakali ukuthi ulele ngaphi. Ngabopha iqhinga ukuze ngimbambe xhaka elomakhwapheni wakhe.
“Ngathi ngibafica bebonke ngazonda ngagana unwabu ngambhaxabula lowomama ofuna ukungithathela indoda. Okwamaphambili ludaba olungeke lukhulunywe emphakathini,” kubika uNkszn Sibindi.
Iphephandaba likazulu likhulumisane loMnu Dube yena olanduleyo indaba le.
“Imibuzo yakho le inzima ukuthi ngiyiphendule njalo iyangehlula, ngingakuphendula ngiyabe ngichitha umuzi wami. Angazi lutho ngomakhwapheni, mina ngizihlalela loMaSibindi, asiladubo,” kuphetha uMnu Dube.
