uMthunywa
Thokozile Mbedzi
ZISELE zinkemile izakhamizi zesigabeni seNgwaladi eNkayi ngemva kokuba enye imuli ifulathele umngcwabo wendodakazi yabo yatshiya izakhamizi zibuthene ngoba umkhwenyana engalobolanga.
Loludaba oluyindabamlonyeni lwenzakale ngeviki ephelileyo.
UMnumzana Thabo Ncube (34) ukhalalelwe isidumbu somkakhe ngabakwabozala ngemva kokudonselana kwemuli lezi ezimbili zibanga ukuthi umntanabo uMdizi Ngwenya angeke angcwatshe amalobolo engakhitshwanga.
Ekhuluma loMthunywa uMnumzana Khonzani Mathuthu oyisakhamuzi sakule indawo uthe kalankani ngesenzo sabakoNgwenya.
“Selokhu ngathwetshulwa yingwe lekhanda selimhlophe angikaze ngikubone okunje okokuthi abantu bayalwa batshintshane amagama azilayo emphakathini kubangwa amalobolo. EsiNdebeleni asikwazi lokhu, umhlaba usuguqukile qiniso.
“UNcube lomkakhe bebehlala bonke babusiswa ngabantwana ababili, lo adlule embeletha ubesengowesithathu. Ukwedlula kukaMaNgwenya yikho okuhle kwaletha uhlupho emulini lezi zombili sekubangwa ukuthi umkhwenyana alobole konke ababembizele khona kanye lenhlawulo yokuthi umntanabo sefile.
“Amalobolo wayebizelwe inkomo ezingu-8 manje besebefuna ziphelekezelwe ngezinye njalo ezintantu ngoba bethi umkhwenyana uphuze lenhlawulo yabo,” kutsho uMnu Mathuthu.
UNkosikazi Phethile Dlamini laye oyisakhamuzi kule indawo uthe imikhuba isihamba iguquka.
“Thina asisakwazi ukuthi imikhuba isitshabalala kanje abantu bekhangele, kuthiwani ngabaphathi bethu ngoba sikwazi ukuthi lomyanga laye wayelobola nxa kuthe kwaswelakala kukhulunyiswane ngesihle amalobolo omntwana wakuqala abeyiwo alobola unina.
“Mina ngokwami ngibona ukuthi abantu abasahloniphi ukufa, sebethanda imali ngoba qiniso ungumzali ungakhalala umntanakho njani yena sefile? Lihlazo leli eselisebantwini.
“Abantu laba bebebanga izinto ezingapheliyo nje kungaqedakali, ekulweni lapha bekubangwa lokuthi uzahlala athathe omunye umfazi adle amandla omntanabo ikakhulu amasimu ngoba besebacenta lamasimu lokwakha umuzi,” kulandisa uNkszn Dlamini.
Usobhuku wakulindawo uMnumzana Stephen Paul Nkiwane ebuzwa ngodaba lolu uthe lwenzakele ngakho umuntu okhangelane lalo ukuze baluqondise kuhle nguMnu Ngwenya ngoba babone kufanele ukuthi imuli zikhulumisane kuhle.
Imizamo yokukhulumisana lamalunga emuli lezi zombili yehlule ngoba bengafuni ukukhuluma lentatheli.
