uMthunywa
SiloNdumiso Sibanda
UMANDLA kasisamazi endlini lezinsuku, kungavele kutshaye ihola lika5 ekuseni uhle avuke nje aphulukundle, sizaze siyembona sekusemini.
Selokhu kwaqala indaba yokujima le kasatshelwa lutho umfana. Lapha endlini angikhulumi, kasabambi lutho ngitsho. Sonke sesisizwa ngaye sibi sikamama uqobo. Usevele akhwaze nje lapha sonke sitshotshobale ngenxa yazo ingalo lazo esezikhukhumele.
Kambe isifuba lesi esikhukhumeleyo yiso esingenza umuntu aze adelele ngaloluhlobo. Umfana kasathumeki, lemisebenzi vele kasathinti. Lapho alala khona angikhulumi lawe nxa ungangena ungala ukuthi kuphuma ijaha elihle njengomntakababa. Umsebenzi yikuyaphakamisa insimbi kuphela eqeda l;apho abuye adle ageze afake zona ezitshengisa ingalo lesifuba, phinde umbone.
Umama angathi uyambonisa, umfana uvele avuke ubhova akhwaze lapha kube nzima. Ufice indlu yonke isitshotshobele nanko phela uyabe esethenjiswa lokubhulwa.
Esikhundleni sokuthi lami ngesabe njebanye baonke, ngangimkhangele umntakababa ngimzwele usizi. Kambe nxa umuntu engasafuni kuboniswa ngumzali wakhe uyabe esezalalela bani. Mnyama bani ozidingela wona mfanekhaya ngokufaka unyoke isandla. Uzawugezwa ngubani ngani futhi?
Into engimangalisayo yikuthi kubo bonke abavukela ekuphakamiseni insimbi, umfowethu nguye yedwa owenza sengathi kazalwa ebantwini ngoba abangane bakhe ngangibabone bebambabamba imisebenzi ngakibo bengakayi egym lapho.
Asazi ukuthi ungenwe yini umfana. Kumbe insimbi yena zimphamabanisa njani ikhanda njengoba abanye bakhe beright nje.
Kambe kukhona afike akuhotshe kumbe akunathe khonale egym okumphambanisa ikhanda aze abe lesibindi sokuphakamisela umzali isandla. Kodwa khona kuyabe kuyini okuphambanisa yena yedwa phakathi kwabafana bonke.
Abanye ziyabathambisa insimbi kanti wena unjani ezikupha intshukuntshu ekukhulela uze ufise lokutshaya unyoko?
Asazi mfanekhaya. Futhi ngizwela yena umntanabantu ohamba ezitshaya isifuba esithi ulejaha esitsho wena.
Zama ukuzinuka amakhwapha ndoda. Igym ayisi yokufundela izitayila zokukhahlela unyoko njalo ukuvukela egym akuqali ngawe bhudi ukuthi sungaze wehluleke lokwendlula umbeda olala kuwo. Zama ubungcono wethu.
Sihlangane njalo.
