uMthunywa
Thando Dube loEthel Ncube
ZINATHISANA itiye izakhamizi zeNgwalandi eNkayi ngendaba yelinye inina elitsheke umlomo ngemva kokubona inja engajwayelekanga.
Inina leli elaziwa ngokuthi nguNaTracy owakoNkosi kubikwa seligula kakhulu ngemva kokuhlangana lenja ebusuku livela emhlanganweni.
UMthunywa ukhulumisane lesakhamuzi sakuleyo ndawo esiveze ukuthi inina leli laqala ukugula ngemva kokuhlangana lenja.
“Abantu bagangile phandle la, asazi kumbe bambangisani umuntu wenkosi, ngelanga evela emhlanganweni eGwelutshena wahlangana lenja.
“Ngokulandisa kwakhe, kwasekusebusuku esendleleni esiya ekhaya wahlangana lenja eyaqala ukumlandela wayixotsha yasala kodwa wathi efika endlini wayithola imile esangweni lomuzi wakhe,” kutsho umfakazi.
Uphinde wathi umakhelwane nguye owananzelela ukuthi umlomo kaNaTracy utshekile ekuseni wabiza ezinye izakhamizi lapho abalandisela ukuthi uhlangane lenja ebusuku.
“Omunye wabomakhelwane uNaManka nguye owathi esiyamvusa ekuseni wamthola umlomo utshekile.
Ngakho sambuza ukuthi imbangela kungabe kuyini waselandisa indaba yokuhlangana lenja ebusuku.
Ngalesosikhathi wahle waqala ukugula wagijinyiselwa esibhedlela.
“Abazukulu bakhe bahle bamthatha segulela kuBulawayo. Kodwa vele umuzi wakhe wake wawudela okwesikhathi eside. Uvuswe ngabazukulu bakhe abathi ngemva kokuwuvusa bamletha ekhaya,” kuchaza umfakazi lo.
UMthunywa ukhulumisane loNkosazana Nyaradzo Nkosi ozalwa nguNaTracy owatsheka umlomo oveze ukuba kuliqiniso ukuthi unina kukhona akubonayo.
“Umama wayevela emhlanganweni wathi esebuyela ngekhaya wezwa kulolutho oluhwabhayo ngemva kwakhe wathalaza wabona yinja enkulu angakaze ayibone. Wekela wazihambela ngekhaya uthe efika wayibona phambi kwakhe kodwa ayingenanga ngekhaya.
“Wavuka-ke ekuseni umlomo ususeceleni kodwa yena engawuboni abantu bananzelela ukuba umlomo wakhe usutshekile bamgijimisela esibhedlela ukuba ayethola usizo,” kuphetha uNkszn Nkosi.
