uMthunywa
Gladmore Ncube
UHULUMENDE uqhubekela phambili ethuthukisa uzulu nanko phela useveze ukuthi uzanika abantu inkomo ikakhulu labo abasendaweni ezivumayo ukufuya.
Umphathintambo wogatsha olubona ngokwenzakala kuleli, iHome Affairs uKhomuredi Ignatious Chombo ubikele uzulu obeseDavies Hall ngoMgqibelo kuviki edluleyo koBulawayo ukuthi bazaphiwa inkomo ukuze bazithuthukise.
Ekhuluma lentatheli kaMthunywa uKhmrd Chombo uthe uHulumende uhlale phansi wananzelela ukuthi inengi labantu elabancedisa ukuthi bathole imizi abalazo inkomo zokufuya ngakho-ke uHulumende sethethe isinqumo sokuthi aphe abantu inkomo.
“Indawo ezaphiwa abantu ukuthi bahlale zindawo ezibavumela ukuthi balime bethi bengavuna bethengisele uHulumende izilimo zabo. Abanengi behluleka ukuthi balime indawo enkulu isizatho siyikuthi abalamali yokuthi bathenge inkomo abazalima ngazo.
“Kungakho njengoHulumende sizaqala ukunika abantu inkomo ngenyanga ezayo njalo zizaphiwa laba okulesiqiniseko sokuthi balayo indawo elamadlelo njalo abazaziphiwa bazahlala behlolwa ngemva kwesikhatshana ukuthi bazigcine kuhle yini njalo zenzelwe indawo elungileyo yokuthi zihlale kuzo,” kuchaza uKhmrd Chombo
Uthe abalimi bazabe bekhangelelwe ukuthi babisele inkomo lezi ngemva kwesikhathi esiyabe sivunyelwene.
“Umuzi ngomuzi uzabe uphiwa inkomo ezingamatshumi amabili kukhangelelwe ukuthi zibiselwe ngemva kweminyaka engamatshumi amabili kuHulumende. Inkomo lezi sikhangelele ukuthi umuntu azigcine kuhle ukuze zizalane zibenengi.
“Okuhle ngokuphiwa lezi inkomo yikuthi ngaze zizalane zedlule inani lakuqala umuntu oyabe eziphiwe uzibisela zingamatshumi amabili.
“Inkomo lezi ziphiwa abantu ngenhloso yokuthi lowo oyehluleka ukuthi abelezakhe uyaphiwa ithuba lokuthi agcine inkomo zikaHulumende zithi zingamzalela azibisele,” kuchaza uKhmrd Chombo
