uMthunywa
Emmanuel Ndlovu
UHULUMENDE wakuleli usekhuthazwe ukuthi abeyingxenye yamazwe akhankasela amalungelo abantwana ngaphansi kohlelo lwamazwe omhlaba olwe-Optional Protocol 3 olujonge ukuthuthukisa amalungelo abantwana.Uhlelo lwe-Optional Protocol to the Convention on the Rights of the Child (OP3 CRC) kubikwa lunika abantwana amandla okulwisana laloba ngubani obathathela amalungelo abo agoqela okutholiswa imfundo egcweleyo, impilakahle, kanye lokuvikelwa ekuhlukuluzweni emakhaya.
Lamalungelo agoqela njalo ukuvikelwa kwabantwana kumikhuba emibi efana lokubasebenzisa ukwenza imali ngokuthengisa imzimba yabo, ukuthengisa izidakamizwa, ukubenza amasotsha kanye lokubendisa besesebancane lokunye okunjalo.
Ekhuluma emhlanganweni wezakhamizi lenhlanganiso ezizimele zodwa kuyonale iviki, uMnumzana Maxim Murungweni ongumqondisi wenhlelo zenhlanganiso ye-Zimbabwe National Council for the Welfare of Children (ZNCWC), uthe leli inyathelo lilakho ukwenza ilizwe lihlonitshwe ngamazwe onke omhlaba nanko liyabe selibukeka njengelizwe eliyingqunquthela kwezokukhankasela amalungelo abantwana.
“UHulumende angaba yingxenye yaloluhlelo silethemba lokuthi lokhu kuzaba yisibonelo ikakhulu kumazwe esizwekazi seAfrica.
“Njengoba uMongameli uKhomuredi Robert Mugabe engumngcinisihlalo we-African Unity kanye le-Sadc, ukuphatheka kwelizwe leZimbabwe ngokusayina ukuba yingxenye yemizamo yokukhankasela amalungelo abantwana kuzasiza ukutholisa uHulumende inhlonipho enkulu ngamanye amazwe omhlaba ahlala esichothoza ngokuthi asihloniphi amalungelo abantu nje jikelele,” kuveza uMnu Murungweni.
Ubuye wathi lumkhankaso unikeza njalo abantwana kumbe inhlanganiso ezibameleyo igunya lokuthi babophise iloba ngubani oncindezela amalungelo abo kungakhathalekile ukuthi ngubani.
Kubikwa abantwana kumbe abameli babo balakho ukuya emthethwandaba eselizweni loba le eyamazwe onke omhlaba ngenjongo yokulwisana lalabo abancindezela amalungelo abo.
Abantwana abanengi bathwele amagabha avuzayo emphakathini ngenxa yokuhlukunyezwa kodwa bengazi ukuthi bangalwisana kanjani lalokhu.
Abanye bahlukunyezwa emacansini ngamalunga omdeni kuthi abangamantombazana bayendiswa besasebancane ikakhulu kumabandla okholo lwesipostoli okungeyinye inkinga esitshiye izimuli ezinengi zimunyu.
