uMthunywa
Charles Dube
Isenzo siyaqhutshwa
Isivumelwano sikamenziwa
Funda imitsho elandelayo:
Umfana uqhuba inkomo.
Umbalisi ufundisa abantwana.
Abantwana badlala ibhola.
Kumutsho wokuqala ibizo elithi umfana liyinhloko yomutsho. Okwenziwa ngumfana yikuqhuba, ngakho igama elithi qhuba liyisenzo. Umfana uqhuba inkomo. Igama elithi inkomo ngumenziwa ngoba liveza ukuthi lokho okwenziwa ngumfana kwenziwa kubani.
Ngokufanayo igama elithi abantwana ngumenziwa kumutsho wesibili. Elithi ibhola lingumenziwa emtshweni wesithathu.
Funda njalo nansi eminye imitsho
Umfana uyayiqhuba inkomo.
Umfana uyaziqhuba izinkomo.
Umbalisi uyabafundisa abantwana.
U-yi- oyingxenye yesenzo uyayiqhuba wenza isenzo sivumelane lomenziwa – inkomo.
U – zi- oyingxenye yesenzo uyaziqhuba wenza isenzo sivumelane lomenziwa – izinkomo.
U –ba- oyingxenye yesenzo uyabafundisa wenza isenzo sivumelane lomenziwa – abantwana.
Ziyatshiyana lezingxenye kusiya ngezigaba zamabizo angomenziwa.
Ingxenye lezi esikhuluma ngazo zitholakala phakathi laphakathi kwesivumelwano senhloko lesiqu sesenzo.
Zonke lezingxenye zesenzo ezenza isenzo sivumelane lomenziwa emtshweni zithiwa yizivumelwano zikamenziwa.
Izimpambosi zesenzo
Elimini lwesiNdebele silakho ukwakha amagama amatsha alengqondo entsha ngokusebenzisa izijobelelo eziqwini zesenzo. Izenzo ezizalwa ngale indlela zibizwa ngokuthi yizimpambosi zesenzo.
