uMthunywa
Kuviki ephelileyo sichazile ukuthi siyini isandiso. Sizayiphinda njalo le ingcazelo sisenzela abayikhuthileyo lasebeyikhohliwe. Isandiso njengesikhanyiso ligama elikhanyisa ngesichasiso, ngesenzo, ngesibanjalo Kanye langezinye izikhanyiso mayelana lesikhathi, lendawo Kanye lesimo.
Izandiso ezikhomba isikhathi
Zinengi izandiso ezikhomba isikhathi. Lapha sizaqamba ezinye zakhona njengezibonelo: nyakenye, izolo, ekuseni, emini, kuthangi, ekadeni, kudala, endulo, ebusuku, kusihlwa, nyakomunye, kusasa, emadabukakusa, empondozankomo, ntambama, namhla, emathathakusa, mandulo.
Isandiso sokukhomba: Kulesandiso sokukhomba esisodwa esiNdebeleni. Njengesabizwana sokukhomba lesisandiso singakhomba eduze, buqamama, lakude. Nansi leso sandiso: lapha, lapho, laphaya.
Izandiso zendawo
Loluhlobo lwesandiso sijayele ukulusebenzisa phose nsuku zonke.
(a) Izandiso ezivela emabizweni amadolobho
Ibizo Isandiso sendawo
iGwanda eGwanda
iLusaka eLusaka
iHarare eHarare
Izandiso ezivela emabizweni amadolobho zakhiwa ngokususa unkamisa osekuqaleni kwebizo kufakwe unkamisa e- endaweni yakhe.
Ibizo iBulawayo lakha isandiso sendawo ngokuqalisa ngesakhi ko- endaweni kankamisa wokuqala walelibizo – koBulawayo.
(b) Izandiso ezivela emagameni emifula
Ibizo Isandiso sendawo
uMzingwane kuMzingwane
uTshangane kuTshangane
uGwayi kuGwayi
Isakhi ku- sithatha indawo kankamisa wokuqala webizo.
Kodwa uma sikhomba indawo ebizwa ngalowomfula isandiso sendawo sakhiwa kanje:
Ibizo Isandiso sendawo
uMzingwane eMzingwane
uTshangane eTshangane
Unkamisa wokuqala webizo uthathelwa indawo ngu – e.
