Uncategorized

Uhlahlela ‘uyisezala’ ngehloka esihlathini

08 Nov, 2018 - 00:11 0 Views
Uhlahlela ‘uyisezala’ ngehloka esihlathini UMnumzana Francis Ndlovu

uMthunywa

YiNtatheli kaMthunywa
KULENDODA yeSigangatsha eKezi ephakathi kobuhlungu obukhulu esibhedlela seUnited Bulawayo Hospitals kulandela ukuhlahlelwa kabili ngehloka ebusweni lijaha elithandana lendodakazi yakhe.
Umetheswacala okutholakale ukuthi nguSikhumbuzo nje kuphela oleminyaka yokuzalwa engu-19, uhlahlele ubabomncane wentombi yakhe, uMnumzana Francis Ndlovu (54) ngoMvulo kuyonale iviki esola ukuthi kungani emkhuze ngokuthandana lomntakamnewabo.

Elinye ilunga lemuli yakoNdlovu elingathandanga ukuqanjwa ngebizo lichaze ukuthi bamadolonzima ngesenzo sikaSikhumbuzo.

“Lokhu ngathwetshulwa yingwe kangikaze ngikubone okunje, kusiqeda amandla njengemuli ukuthi umfana lo ubengenwe yini aze ayegamula ubaba ngoba ekhuzelwe ukuthandana lomntwana omncane.

“Indlela amlimaze ngayo itshengisa ukuthi ujaha lo ubefuna afe kodwa iNkosi yala yamphephisa. Lesi yisihluku sibili njalo liyezi elimnyama elembese umuzi wangakithi.

“Umnawami uthi wayezihlalele nje kusanda ukunqunda amehlo wezwa tshwathi tshwathi kodwa wangaboni muntu wasesizwa ngehloka elafika lamhlala esihlathini kabili. Inhlanhla nje lujaha wathi ebona esethe daca phansi wacela ezinyaweni kodwa uFrancis wasala evuka wabuya ngakwami ezodinga uncedo ngoba vele uzihlalela yedwa,” kubika lelilunga lemuli.

Uqhubekele phambili esithi kukhona okutshaya amanzi ngokuganyulwa komnawakhe.

“Abadala bathi bona okukhulu akulamkhosi kungakho lathi sibona angathi kukhona okukhulu esikhona sizakuzwa. Kambe nxa umfana ongaka egamule umuntu omdala kubangwa ukuthi ukhuzelweni. Ngizwa ubuhlungu kakhulu ngesiga lesi, sokulethe ingxabano enkulu kakhulu sibili lokhu,” kuchaza ilunga lemuli leli.

Ungezelele esithi umfana lo uqamba amanga esithi uFrancis umthethisile yena wamkhuza kuphela emkhuzela ukuthandana labantwanyana abancane.

“Simbambile samusa emapholiseni, yiwo azabona ukuthi enzeni ngodaba lolu, thina singeke sitsho lutho,” kubika ilunga lemuli leli.

Ekhululuma lentatheli umlisa wakule indawo uMnumzana Edward Sigangatsha uchaze ukuthi ulusizi ngodaba lolu.

“Ngimadolonzima ngesihluku sokuganyulwa kukababa uNdlovu. Mina angilalwazi kangako ngokuthi bebebangani kodwa engingakutsho yikuthi olimeleyo usesibhedlela,” kubika uMnu Sigangatsha.

UMthunywa wenelise ukuyabona uMnu Ndlovu esibhedlela yena obephakathi kobuhlungu othe lokhu kuyindida okwamehlelayo.

“Umfana lo asazi ukuthi wangigamulelani, wafika kimi ethi ufuna imali mina ngathi angilayo wangihlahlela kabili eceleni kwelihlo. Ngiyafuthelwa kakhulu ngilapha,” kuphetha uMnu Ndlovu.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds