uMthunywa
MHLAWUMBE uTwine Phiri sekumele athengise iqembu leCaps United ngoba labadlali sebefuna ukulandela umqeqetshi, uMark Harrison osetshiye umsebenzi.
UHarrison, kuzwakale esesayine isivumelwano esilemali engcono kuthimu yeTownship Rollers, edlala kuligi yeBotswana.
Umbiko wokutshiya kukaHarrison usuhatanise umnikazi wethimu, uPhiri, okubikwa uhlalele evalweni njengoba labadlali sebebika ukuthi angeke bakumela okweCaps United.
UHarrison ubeke indaba yakhe phambili kukaPhiri ngoMvulo. Abafakazi abaqotho kuqula lebhodi yabasekeli beCaps United batshayele uMthunywa ucingo babika ukuba abadlali baphezu kokuthumela incwadi yokuthi baseduzane lokukhalala umdlalo.
Abadlali balithimu bakhalala umdlalo ngoMabasa koBulawayo, bekhalaza ngokuqilwa ngeholo labo.
“Ngemva kokuzwa ukuthi umqeqetshi [Harrison] usetshiya, kulabadlali abethusela ukwenza okufanayo.
Akulamuntu osethole imali yakhe yonke kuCaps United. Abadlali bayazi lokhu kodwa ukuthulisela kwabakhokheli kanye laye uTwine [Phiri] yikho osekudale ingxabangxoza le,” kubika ilunga leCaps eliseHarare.
UHarrison, ebika ngokusuka kwakhe kuMakepekepe, uthe: “Angijabuli ngesiphatho engisithole kuCaps United ngenyanga ezine ngingumqeqetshi wayo.”
UPhiri, etshela iphephandaba likazulu phakathi kweviki, uqale ngokuphikelela ukuthi usalungisisa okungahambi kuhle wasevuma ukuthi ithimu yakhe ingadilika ngokwehluleka ukuthola imali yokubhadla izikwelede.
“Akulamali njalo lokhu akuhluphi iCaps United kuphela. Lamanye amaqembu aphakathi kwenkinga efanayo,” nguPhiri lo, ophinda abengumgcinisihlalo wePremier Soccer League.
UPhiri uthe akufihlwa njalo kasoke abelenhloni zokuthi ithimu yakhe idonsa nzima ngenxa yezikwelede.
NgoMbimbitho, iphephandaba likazulu labika ngokugcweleyo ukuthi iMakepekepe isithengisa amanzi okunatha athelwa ezigubhini, njengendlela yokuhlanganisa imali yokuqhuba imidlalo yethimu.
Iphephandaba likazulu likhulume labanye abadlali baleliqembu abathe loba bedlale kuhle enkundleni kumidlalo edluleyo, sebediniwe ngokudelelwa zinkokheli zabo.
Ngokutsho kwabafakazi abaqotho, abangabadlali abaxoxe loMthunywa ecingweni, bathe kumi manzonzo kuqembu labo.
“Udubo olubhekane leCaps United ngolwemali. Sithwala nzima ngaso sonke isikhathi nxa sekumele siphiwe imali yethu. Amabhonasi awaphumi, njengeholo asikhulumi,” kutsho umfakazi lo.
Ngomnyaka odluleyo iqembu leCaps United lakhetha ibhodi entsha ekhokhelwa ligqwetha elazakalayo kakhulu kuleli, uLewis Uriri, Munyaradzi Mazhande, Alex Munyaka, Nhamo Tutani, kanye lodokotela uMordecai Sachikonye lo Khumbulani Mhlophe.
Ibhodi le isiguquliwe ngokuqhatsha abanye njalo ababalisa uAlois Bunjira, obona ngezokuthengiswa kwebizo lethimu kumabhizimusi.
Kuzwakale njalo ukuthi ibhodi le bekumele iphume lamaqhinga okudingela iqembu leli imali kodwa kwehlula.
“Okunye okusidlela imali yikuthi iqembu lidlalela enkundleni yeNational Sports Stadium. Kungcono sisondele eGwanzura ngoba ingagcwala, ithimu iyathola imali. Sikhuluma nje akulamali esiyitholayo ngoba ihlekana labantu lifika libhadale imali engange-$2 000,” ngomunye umfakazi lo oseduzane lamawofisi eCaps United owesabe ukuqanjwa ngebizo.
Okutshayisa abalandeli beMakepekepe ngomoya yikuthi ithimu izimisele ukuthi ingene enkundleni kuyo yonke imidlalo. Ukuzimisela kukamqeqetshi uMangwiro lakho kuncede kakhulukazi ukuthi ithimu le ingadiliki.
