uMthunywa
Thando Dube
KULEJAHA lesigabeni seBethel eGwanda elisele lithoba amanxeba ezihlalweni ngemva kokugwazwa izihlalo ngenye indoda kubangwa intombi.
Isiga lesi esitshiye izakhamizi zesigabeni seBethel zimanagele senzakale ngeviki ephelileyo lapho uLiberty Nkomo agwaze khona uBrian Ncube izihlalo kubangwa uCynthia Ndlovu, obeqome amajaha la omabili.
Ekhuluma loMthunywa uNkosazana Nozipho Sibanda uthe sebekujwayele ukuthi amajaha esigabeni leso adlephane kubangwa intombi.
“Thina sesikujwayele lokhu ukuthi abantu balwe balimazane bebanga amankazana, kodwa okwenzakale mhlalokhuya kusimangalisile lathi ngoba abantu laba bebengadakwanga ngitsho, thina sijayele abalwa sebedakiwe kodwa okwalaba hatshi bekunzima.
“Mina ngizwa kuthiwa uLiberty walanda uNcube ngakibo wafika wambuza ukuthi intombi seziphelile na esegijimisa eyakhe ngoba kukhanya uLiberty nguye owaqala ukukhonjwa,” kutsho uNkszn Sibanda.
UBridget Ncube ongudadewabo kaBrian uthe bamangala uLiberty sethutsha engasadlanga nkotshana ezokulwa lomnewabo.
“Thina sasizihlalele nje sikwejisile sabona uLiberty efika esilwa lomnewethu, laye akulanto ayengayenza wazama ukumlwisa ezivikela, mina ngehluleka lokubalamula ngoba ngangingedwa njalo ngingela lasibindi sokwenza lokho.
“Ekulweni lapha uBrian wacina sehlezi uLiberty amadundulu emtshaya ngenqindi, ukuthi ingqamu wayikhipha sikhathi bani anginanzelelanga ngabona sehlabe uBrian yikho lapho engahlaba khona umkhosi kwasekubuya omakhelwane bezomncedisa.
Ebuzwa ngendaba le, uLiberty uvumile ukuthi yenzakala njalo uyazisola ngesenzo sakhe lesi.
“Liqiniso sibili kodwa imuli yangakithi isithume umuntu ukuthi sikhulumisane angangibophisi. Ngiyazisola ngoba sengiphose ngaya ejele ngenxa yentombi, ngiyamxolisa umfowethu sibili,” kutsho uLiberty.
Imizamo yokukhulumisana loBrian yehlule ngoba ubengabambeki kumakhalekhukhwini.
