uMthunywa
YiNtatheli kaMthunywa
ZIKHALA ezimathonsi izakhamizi zesigabeni seNyamazana eNkayi ngokhansila ozidlela umumbu okumele ziwuholiswe zisa le zisidla ingqweqwe zomlomo.
Kubikwa ukhansila uJana Ncube usebenzelana labosobhuku “ukudla” umumbu okumele ukuthi ngabe uholiswa abantu asebekhulile esigabeni.
Umumbu lo uvela kuHulumende ngaphansi kogatsha lwezokugcinwa komphakathi olwe-Social Welfare.
Kufike endlebeni zalintatheli ukuthi umkhuba wokutshontshwa komumbu usubhahile eNkayi.
Abafakazi abaqotho baveze ukuthi izakhamizi zingaze zimangale emapholiseni lakuzisebenzi zikaHulumende, akulanyathelo elithathwayo.
Ekhuluma loMthunywa uMnumzana Gideon Sibanda, oyisakhamuzi uthe ukhansila wabo abasamthembi ngitsho.
“Umumbu kwakumele utholwe ngumuntu wonke osekhulile esigabeni kodwa ukhansila uNcube wakhetha ukuwudla yedwa.
“Mina umumbu lo ngiwuthole kanye kuphela usanda kufika sekuze kulamuhla angikaze ngiwuthole futhi. Isimanga amasaka omumbu afika sonke siwakhangele kodwa ukhansila uNcube labosobhuku banikana bodwa labantu babo thina siswela,” kutsho uMnu Sibanda.
“Ayilunganga into le eyenziwa ngukhansila wethu ngoba ukudla lokhu kumele kusincedise njengabantu abadala asisenelisi okuyangaphi ukuzisebenzela, kodwa bona banikana bodwa labosobhuku,” kuqhuba uMnu Sibanda.
Esinye isakhamuzi sakule indawo esithe singuNkosazana Samkelo Mthethwa sithe sebediniwe ngabakhokheli besigabeni abaqila izakhamizi bona behlezi kuhle.
“Thina asisakwazi ukuthi senzeni ngabakhokheli bethu esigabeni lapha, abadala kulamabele abawaholiswa yiSocial Welfare okumele abancedise, siyamangala lathi nxa besithi abawaboni amabele la ngoba ukuholwa siyabona eholwa ukuthi aya kubani lathi siyazibuza nje,” kutsho uNkszn Mthethwa.
Ebuzwa ngodaba lolu uKhansila uNcube uthe abantu besigabeni lesi baphongukhuluma izinto abangazaziyo yena ngeke adle amabele abadala.
“Abantu balapha bayathanda ukukhuluma kakhulu, mina lamabele la kafikeli emzini wami ngitsho, abuya labo abe Social Welfare banike abantu.
“Abantu abadala lapha banengi kakhulu ngakho amabele lawa keneli bonke kuthola abalutshwane kuphela, ngeke ngidle amabele abadala mina,” kuphetha uKhansila Ncube.
Imizamo yokukhulumisana labo gatsha lweSocial Welfare yehlule ngoba ucingo lwabo belungabanjwa.
