uMthunywa
Msilisi Dube
KULENDODA yelokitshini leNketa 6 koBulawayo ehlahlele omunye umalukazana wayo ngehloka ehlombe ngoba ebophise unyanewabo.
Umsolwa uNoel Chibatwa oleminyaka yokuzalwa engu-61 uhlasele umalukazana wakhe, uKulore Magola (26) ngomnyaka ophelileyo.
Umtshutshisi wecala leli uMufaro Mageza ubikele inkundla yeWestern Commonage ngeviki edluleyo ukuba umamangala wafika lepholisa endlini kayisezala efuna libophe unyanewabo.
Umamangala usesithenjini njalo kukhanya wayexabane lonyanewabo lo.
Kubikwa ipholisa laveza ukuba lizobopha unyanewabo kamamangala okuyikho okwacunula umsolwa wahle wadobha ihloka wamgamula ehlombe.
Umamangala wathwalelwa esibhedlela seMpilo.
Ebuzwa ngumantshi uNkosikazi Tancy Dube umsolwa ulivumile icala lakhe wathi wakwenza lokho ngoba ecunulwe yikuthi umamangala wayengafuni ukuba sesithenjini.
Ngemva kokuzwa ubufakazi lobu umantshi ugwebe umsolwa ukupika entolongweni okwenyanga eyodwa kumbe ukuthi ahlawule imali engange-$100.
