uMthunywa
Umcindezeli wase-Canada ufuna ukwakhela abahlabeleli bakoNtuthu isitudiyo. Umcindezeli lo waziwa kakhulu kuleli ngengoma yakhe ethi Mugomba Remoto eyandise ukubukiswa kumabonakude we-ZTV, ayihlabela lomfana wakoNtuthu osakhulayo, uTinashe “Nashie” Maravanyika, odume ngengoma yakhe ethi Kuchibhorani.
USam owazalwa enguSamuel Muguraguri, ungumcindezeli kanye lomhlabeleli womculo wehip-hop lanxa kulezinsuku ehlanganisa le-reggae le zimdancehall. Wazalelwa eMufakose wakhulela khonapha edolobheni lakoBulawayo engakayi kweleCanada.
Kuliviki uMthunywa uliphakela uSam yena olandisa kabanzi ngomsebenzi wakhe.
Uqalise nini ukuhlabela kanye lokucindezela umculo?
Sam: Ngaqala ukwenza umculo ngikuGrade 7 ngomnyaka ka2000 kodwa ngaqala ukuhlabela okuzwayo ngo2010. Ezokucindezela umculo ngingene kuzo ngomnyaka ka2012 lapho engisebenzelane labahlabeleli abatshiyeneyo ngibenzela umculo wabo ngezami izandla. Lapha ngitsho ukuthi bekuyimi ebengihlanganisa amavidiyo abo kumbe ukubaphekela iziginci zabo ukuze kuphume indlikizane yengoma. Ngisebenze kakhulu lo Sebastian Magacha ongumhlabeleli odume kakhulu kuleli kanye lo Nashie, umfana wakoNtuthu.
Nguphi umculi okukhuthazayo?
Sam: Ngikhuthazwa ngabaculi abathi uDMX, uMeek Mill, uMaskiri, uDavid Chifunyise, uCalvin kanye loStunner. Laba yibo abangenza ngangena ngagxila emculweni ngoba bayayazi into abayenzayo.
Abasiki bebunda bathi ufuna ukwakha isitudiyo lapha koNtuthu?
SAM: Yebo liqiniso lelo. Ngifuna ukwakha isitudiyo sokuncindezela umculo lapha koBulawayo njengendlela yokuthuthukisa abahlabeleli bakuleli, bona abatshona bekhala bengatshaywanga, besithi zonke izinto zitholakala eHarare.
Ngobani ofuna bacindezele kuleso situdiyo?
Sam: Kangisoze ngakhetha mhlobo. Inhloso yami ngeyokuthi ngithuthukise yonke inzalo yakuleli, elesifiso sokuhlabelela kanye lethalenta. Okwenza inengi labahlabeleli lingani kalicaci yikuswelakala kwempahla yokucindezela kanye lesikhathi. Ukuncindezela umculo kuvele kuyadula njalo yikho okwenza abaculi behluleke.
Wenza msebenzi bani kwele-Canada?
Sam: Ngisuke eZimbabwe ngomnyaka ka2011 ngenhloso yokuya kwenza izifundo zokuhlanganisa umculo eze-Mastering and Engineering in Music. Vele ukwenza umculo kuyinto engiyithandayo futhi esegazini lami. Njengoba lami sengithole ithuba lokuya emazweni sengibone kungcono ukuthi ngiphathise isizwe sakithi ngokuthi ngakhe isitudiyo sokucindezela umculo koNtuthu.
Uyacindezela na umculo weze-dancehall njengoba usukhule kangaka kuleli?
Sam: IRaggae le-zimdancehall kuyathandeka eZimbabwe yonke ngakho kangikhethi ukuthi ngicindezela umculo onjani. Umculo we-dancehall uyathandeka ngitsho lalapha kweleCanada.
Umculo we-hip hop wandise ukuhlanganiswa lodlakela lenzondano. Wena uthini ngalokho?
Sam: Akulandaba lokho. Ngithemba uyizwile ingoma eyatshaywa nguMchezanana ekupheleni kuka2014. Kuliqiniso lokho kodwa kakutsho ukuthi abantu bayabe bezondana, yindlela yakhona yokuhlabelela. Ungabona umuntu esekufaka esifubeni sakhe lokho, sekumkhathaza kutsho ukuthi kalangqondo.
Kungani ukhetha ukwakha isitudiyo koNtuthu, hatshi eHarare?
Sam: Isizatho esimqoka yikuthi abahlabeleli abanengi basuka koNtuthu besiya eHarare ukuyacindezela umculo wabo. Amathuba koBulawayo malutshwane. Lanxa ingoma zingaze zidlalwe emisakazweni, imali ikuma-shows ngakho kuqakathekile ukuthi abadlali bazane labo-promoter.
Nxa ukhangele i-hip-hop yakuleli, ungayiqathanisa leyakwamanye amazwe?
Sam: Akulamehluko, umculo wakuleli ulakho ukuncintisa esitikini somhlaba wonke jikelele. Uhlupho olukhona kusekuqhutshweni kwemisebenzi yabaculi, lapho kusasilela sibili.
Kuyini ofuna ukukubona kusenzakala kwezomculo zakoNtuthu?
Sam: Isifiso sami yikubona uzulu esekela abadlali ngokupheleleyo kanti lama-shows enziwayo enelise ukubhadala abadlali ukuze baqhubekele phambili bepheka umculo. Abasakazi labo bamele basize baqhunse ingoma zabadlali bakoNtuthu ukuze bazakale.
Nkuthazo bani ongayitshiyela abadlali abasakhulayo?
Sam: Ngibakhuthaza ukuthi bangazami ukuzenza abanye abantu, bangazami ukuzenza amaSouth Africans. Kabasebenzise ulimi lwakibo baziqhenye ngalo kanye lokuba ngamaZimbabweans.
