Uncategorized

Ufisa ukuletha intuthuko eCowdray Park

14 Mar, 2019 - 00:03 0 Views
Ufisa ukuletha intuthuko eCowdray Park UMnu Godfrey Mushauri

uMthunywa

Ethel Ncube

KULENDODA elesifiso sokuba ngukhansila eCowdray Park koBulawayo esiveze ukuthi injongo yayo yikuletha intuthuko elokitshini leli.

UMnumzana Godfrey Mushauri uveze ukuthi angaphiwa ithuba uzakwakhela izakhamizi isikolo, alungise imigwaqo kanye lokwakha enye ikilinika engavalwayo (24 hour). 

UMnu Mushauri uthe ilokitshi leCowdray Park lisasalele emuva kumpucuko ekhangelelwe ebantwini abahlala emadolobheni. “Ngingakhethwa ukuba ngukhansila ngifisa ukuletha inguquko kumphakathi. Njengoba nje ezinye izithelo zemisebenzi yami lizibona ngizaqhubekela phambili ngisebenza. Sengakha ikilinika lapho abantu abafika babhadale imali elingeneyo babonwe ngudokotela bathenge lemithi khonapho.

“Isibhedlela lesi asivalwa, sisebenza ubusuku lemini. Okwangenza ngaba lesibhedlela lesi yikuthi ikilinika yekhansili ekule indawo incinyane kodwa abantu banengi kakhulu.

“Ngikhangelele njalo ukuthi abantu bathole ukwelatshwa mahala kuhlelo oluzenziwa kuviki ezayo, loluhlelo luzaqala lwenzelwe eSigodweni. Lapho kuzabe kulamadokotela atshiyeneyo abantu behlolwa njalo bephiwa lamaphilisi kungelambhadalo,” kubika uMnu Mushauri.

Uqhubekele phambili echaza ukuba ufisa ukuba yinkokheli ezinikeleyo njalo ezaphakamisa impilo kazulu.

“Lapha elokitshini leli ngifuna ukuba kwakhiwe isikolo semisebenzi yezandla ukuze abatsha bafunde bathole okokwenza bengacini besona ngoba betshona behlezi. Bengafunda imisebenzi yezandla balakho ukuthi bavule amankampani abo labo bacine sebeqhatsha abanye.

“Okunye engifisa kwenziwe yikuthi izindlu ezingelamanzi zidonselwe amanzi kuthi ezingela zambuzi zakhiwe siqede indubo lezi,” utsho njalo.

“Abantu abahlala endaweni yeGarikai bathwele nzima sibili yikho nje kumele kudonswe amajogwe kuqedwe udubo lolu abaphakathi kwalo. Udubo lolu lungekela ukulungiswa kungacina kuqhamuka imikhuhlane efana labo-cholera,” kuveza uMnu Mushauri.

Uphinde waveza ukuba umgwaqo lawo uqakathekile kule indawo ngoba lawo ubisela emuva ingqubela phambili.

“Imigwaqo ifile, ifuna ukulungiswa. Izulu lingana izimota azenelisi ukuthi zifikise abantu eduze lalapho abahlala khona. Abantu bathwala nzima behamba umango omude belanda izimota.

“Ngasengivule eyinye ikilinika encane eSigodweni ngacina ngiyivala ngodubo lomgwaqo ngoba amadokotela ayesehluleka ukutshayela izimota zabo besiya khonale.

“Imigwaqo ingalungiswa kuhle lanxa izulu linile abantu kabazisweli izimota ezibafikisa lapho abaya khona,” kuphetha uMnu Mushauri.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds