uMthunywa
Fairness Moyana
KULENDODA yeDete emangalise inkundla ngemva kokuthi yadlwengula untombazana oleminyaka engu-14 ngoba ‘‘engumama’’ kungakho usengumuntu omdala.
UDarlington Munkuli (20) owesiqintini seDingani eDete ukhulume amazwi la ngesikhathi emiswe phambi kukamantshi weHwange uPortia Mhlanga esetheswa icala lokuya emacansini lomntwana oleminyaka engaphansi kwengu-16.
“Nkosi, ngicela ungixolele, ngalala lomamangala lanxa ngangisazi ukuthi umncane ngenxa yokuthi ulomntwana olenyanga ezintathu lenye indoda. Ngabona sengathi usengumuntu omdala njengoba esengumama,” kutsho umsolwa.
Kuzwakale ukuthi phakathi kwenyanga kaMabasa nyakenye umamangala wamithiswa esenza izifundo zakhe ze-primary andubana abelethe ngenyanga kaNhlolanja lonyaka. Indoda eyayimithisile yona kubikwa yahle yadliwa zindunduma isizwe udletshana lokuthi idingwa ngamapholisa.
Kuthe ngenyanga kaNkwenkwezi umsolwa wakhombisa umamangala njalo baqala ukuthandana behlangana lemacansini egangeni.
Kubikwa umamangala watshela umnawakhe ngobudlelwano bakhe lomsolwa okwenza wabikela ugogo wakhe laye ongazange athande ukuphozisa amaseko, wahle wayabikela amapholisa.
Ugogo kamamangala ubikele inkundla ukuthi wabikela amapholisa ngoba esesaba ukuthi indoda eyamithisa umzukulu wakhe izekela ukuthumeza ukudla.
Umsolwa ugwetshwe ukuthi ayehlala ejele umnyaka kodwa umantshi wesula inyanga ezintathu kukhangelelwe ukuthi angenzi icala elifanayo kuminyaka emihlanu ezayo. Kuthi inyanga eziyisificamunwe munye eziseleyo uzasebenza emphakathini okwamahola angu-210.
Umtshutshusi kulelicala bekunguMnumzana Tinomupeyi Mbiza.
