uMthunywa
Nkosilathi Sibanda
IHIGHLANDERS FC isiqede imidlalo eyisithupha inganqotshwa okuyikho okuzenza iShabanie Mine City ingene ilovalo kumdlalo odibanisa amaqembu womabili ngeSonto eBarbourfields.
Ihuba ngenjabulo inkamba yabadlali beHighlanders kulandela ukubonisa kwayo abalandeli ukuthi ijonge ukukhankasela ukuthwala inkezo yeCastle Lager. Phakathi kokujabula lokhu, amehlo athe nhlo kumqeqetshi uMadinda Ndlovu.
Nguphi umqeqetshi loba iqembu elingakhona ukubamba uMadinda ngendlela atshova ngayo? Umqeqetshi lo kusegcekeni ukuthi ukhaliphile kwezenguqu ngoba ngokunqoba kwakhe, usethole inhlonipho kwabanye abaqeqetshi kuligi ephakemeyo.
Loba zitshayiwe imvokloklo eBF lakwezinye inkundla, kukhona osekukhange amehlo ngoMadinda.
Umqeqetshi lo ulobuciko bokutshintsha umdlalo kungela ocabangela ukuthi uzanqoba.
UMthunywa ukhulume lokaputeni weqembu uHonest Moyo obike ukuba akulamqeqetshi ofana loMadinda.
“Ulolwazi lomdlalo engibona angathi akula omunye umqeqetshi ongamedlula,” nguMoyo lo ekhuluma lephephandaba likazulu enkundleni yeBF ngemva komdlalo weHighlanders leChicken Inn ngeSonto edluleyo.
Kusenjalo, kungxoxo yakhe lomsakazo weBossoTV, uMadinda wabika ukuthi abasekeli balithimu bakhusela iqembu okumjabulisayo.
Umqeqetshi lo uthe lokhe eqalise umsebenzi, usenanzelele ukuthi ukuhlabelela kwabasekeli yikho okwenza iBosso idlale kuhle, inqobe nxa ikwezinye inkundla.
“Sisafuna ukudlala imidlalo ezenza ukuba amaqembu esidlala lawo asihloniphe,” kutsho uMadinda.
IBosso ihlezi ngobutofotofo kulogu yeCastle Lager. Iqembu likaMantengwane akukho lapho elivuza khona ngoba imvimbi zivala okokuthi lamanzi angeke avuze.
