uMthunywa
YiNtatheli kaMthunywa
ZIDIDEKILE izakhamizi zesigabeni seZweremu eGokwe ngaphansi kwenduna uChireya ngemva kokuba elinye inina lifakele umkalo umuthi wamagundwane kubangwa ukuthi useqakathekisa idlalicatsha ukwedlula imuli yakhe.
UNkosikazi Magasa Kahonde oleminyaka yokuzalwa engu-68 ufakele umkakhe, uMnumzana Sekerani Kahonde umuthi wamagundwane ikhonapho khonapho ekudleni ngeviki ephelileyo.
Kuzwakale ukuthi uMnu Kahonde usizwe yikukhipha.
Kubikwa uMnu Kahonde ubevele esezihlalela lomazakhela wakhe okuyikho okwabangela ukuthi umkakhe amfakele ukhonapho khonapho ekudleni.
UMthunywa uzwe ukuthi uKahonde ubesesithi angathengisa inkomo imali anike umazakhela, afihle eyinye emasokisini kukanti esalayo ubeyigebhela phansi ngoba efuna ukuthabisa umazakhela.
UMthunywa ukhulumisane losobhuku uMnumzana Albert Chibhonda yena oveze ukuthi badidekile ngesenzo sikaNkkz Kahonde.
“Asilankani ngesiga esenziwe nguNkkz Kahonde ofakele umkakhe ukhonapho khonapho kodwa okuncedileyo yikuthi ukhuphile njalo lesisu besimgijimisa.
“Ababili laba kwakumele bakhulumisane hatshi ukuthi bazame ukubulalana. Kungakho indaba le sihle sayisa enduneni kanye lemapholiseni,” kutsho uMnu Chibhonda.
UNkosazana Melody Mpofu oyisakhamuzi uveze ukuthi uNkkz Kahonde ubehlala ekhala ethi umkakhe umthwalise nzima lemuli ngoba imali isiphelela kumazakhela.
“Ubehlala ekhala esithi umkakhe uyamlambisa labantwana njalo lezifuyo ziyaphela imali yakhona bengayidli. Phezulu kwalokho nguye labantwana abelusayo. Ngizwa ubuhlungu ngoba asizange sikuthathele inyathelo ngabe kazange aze afikelwe ngumoya omubi kangaka thina sasisithi yinto edlulayo,” kulandisa uNkszn Mpofu.
Induna uChiya Chireya ebuzwa ngodaba lolu uvumile wathi lwenzakele kungakho ukhuthaza uzulu ukuthi nxa belokungezwani kabaye kubosobhuku loba emapholiseni.
“Udaba lwenina elidlise umkalo umuthi wamagundwane wasinda ngenhlanhla yenzakele ngakho ngikhuthaza uzulu ukuba nxa elokungezwani kabaye kubosobhuku noma emapholiseni. Nxa umuntu enze kanje kumele ajeziswe ngoba kungafundisa lentsha umkhuba omubi ngakho ngithemba amapholisa azakwenza umsebenzi wabo,” kuphetha iNduna uChireya.
