uMthunywa
Thando Dube
UMTSHADO uke wama okwemizuzu, umpululu lemivokloklo yama ukutshaywa, lokugida kwamiswa komunye umtshado weGokwe kulandela ukucatsha kwebhodo yenyama.
Isiga lesi senzakale ngoMgqibelo odluleyo emtshadweni kaOmen Masai loElizabeth Moyo ngemva kokuba uFarai okubikwa ephila lomkhuhlane wengqondo etshontshe ibhodo yenyama akade ifanele idliwe emtshadweni wadla bayibayi.
UMthunywa ukhulumisane loMichael Gumbo okade ekhona kulumcimbi othe abantu bakhuze imihlolo ibhodo yenyama sinyamalele.
“Izakhamizi zikhuze imihlolo umtshado usume ntsi abantu abakade bepheka kanye labakade beze emtshadweni sebedinga ukuthi ibhodo yenyama abakade beyitshiye ixhwatha iphelele eziko yini?
“Ibhodo idingiwe abantu bangena emakamelweni onke lawokulala bayiswela. Omama labobaba abakade bencedisa ukupheka bacine sebevusa umsindo becabangelana ngokulahleka kwebhodo,” kuchaza uMnu Gumbo.
Uphinde wathi bekuzacina kulwiwa kodwa kuncede abantwana abaveze ukuthi babone uFarai edlalela duze leziko.
“Ngesikhathi kusaphikiswana kulomntwana otshele uina ukuthi uFarai nguye ongabe ethethe ibhodo yenyama ngesikhathi abantu betshiye imbiza zizodwa kusathatshelwa ukungena kukamakoti. Bahle baphuma abafana balonda unyawo lwakhe bayithola ibhodo yenyama egangeni kodwa sokuthelwe inhlabathi umuntu wenkosi esezihambele.
“Inhlanhla nje bekungayisiyo yodwa ibhodo yenyama kodwa ukudla bekungeseneli kuhle. Kodwa umtshado uqhubeke waphutsha kuhle.
UMthunywa kenelisanga ukukhulumisana losobhuku wakuleyondawo.
