uMthunywa
YiNtatheli kaMthunywa
UDANNY “Deco” Phiri loKnox Mutizwa kumele babeyingxenye yabadlali abazakhethwa kukhalenda yabadlali, kutsho abalandeli bakanobhutshuzwayo.
Kulimpelaviki kuzakhethwa abadlali abazangena kukhalenda yengcitshi zomdlalo kanobhutshuzwayo kuligi yeCastle.
Inhlanganiso yePremier Soccer League isikhiphe umbiko wokuthi ukhetho lwengcitshi zabadlali luzaqhutshwa ngesonto edolobheni leHarare.
Intatheli zemidlalo, abaqeqetshi labokaputeni bahlanganisa amakhanda kumavoti okudinga bona abadlali benguqu abadlala ukwedlula abanye ngesizini ka2015.
Kumbuthano lo kuzakhethwa lomqeqetshi okhuze kuhle iqembu lakhe. Leqembu elitshengise ukuzithoba ngokulandela imithetho yomdlalo lizaphiwa umvuzo. Phakathi kwequla labadlali abazakhethwa, kuzaphiwa umvuzo kulowo ohlohle amanengi.
UMthunywa ukubika ngokungesabi ukuthi kusegcekeni ukuba uKnox Mutizwa nguye ozathola isicoco somdlali othele amabhola amanengi emambuleni.
UMutizwa usehlohle alitshumi lane, sekusele umdlalo owodwa ukuthi kugqitshwe isizini. Umdlali weChicken Inn uEdmore Chirambadare ulandele elamabhola alitshumi lanye.
Ngokunjalo, iphephandaba likazulu libuze abalandeli bomdlalo abahlala kulumhlubulo welizwe ukuthi nguphi umdlali abafuna ukuthi akhethwe.
Kubadlali abaqanjiweyo, ukaputeni weChicken Inn uDanny “Deco” Phiri uphume phambili. Kungumbono wabalandeli ukuthi uPhiri nguye odlale kuhle ngoba ukhokhele ithimu yakhe yachinsa inkezo yeCastle.
UPhiri ukhokhele njalo iqembu lamaWarriors aze afika kumncintiswano weAfrican Championships, iChan.
Abalandeli abahlanu abakhulume loMthunywa bathe bafuna uPhiri athathe isicoco saphezulu.
“Ngubani omunye okungathiwa udlalile ngaphandle kukaDeco (Phiri). Mina ngibona kunguye i-Soccer star of the year,” nguMlamuli Moyo oweTsholotsho lo.
USinikiwe Thabe oweGwanda uthe okwenza akholelwe ukuthi uPhiri uzathola amavoti amanengi yikuthi wenelise ukuba senzikini yomkhankaso wokuphendukisa inkezo yeCastle koBulawayo.
“IChicken Inn ibuyise inkezo yePSL ekhaya layo. Inguqu idlalwa koBulawayo ngakho iChicken Inn yenz kuhle. Umdlali okumele aphiwe umvuzo omkhulu nguDanny Phiri. Ngangisithi kalazi ibhola umfana lo kodwa indlela atshibilike ngayo phakathi kwenkundla iyehlule abanengi.”
Umsekeli weChicken Inn olodumo izwe lonke, uMcCleod Ncube ubike ukuthi nxa uPhiri engakhethwanga, kasoke avume ukuthi ubekhona omedluleyo.
“Ukubuzana ngalokho yikudlalisa isikhathi. Umdlali owedlule bonke nguDeco ukaputeni wakhe. Bengakhetha omunye kuyabe kwenziwe i-fraud.
UNcube uqhubeke wathi umqeqetshi wabo uJoey Antipas uzathola isicoco sokukhuza ithimu.
Ngomnyaka odluleyo isicoco somdlali owedlule abanye sithethwe nguDouglas Daudi weZPC Kariba.
Nxa uPhiri engasithola isicoco esiphezulu uzabe engumdlali wakuqala ophuma kulumhlubulo welizwe ngemva kweminyaka.
Kusenjalo umaqhuzu wePSL uKennedy Ndebele uthe sebelinde ilanga lokhetho.
“Ukhetho lwabadlali abazangena kukhalenda yeligi yePSL lukhona kulimpelaviki eHarare. Kuzaqhutshwa umsebenzi ofanayo njengeminyaka yonke.
“Isicelo sethu yikuthi kukhetho kakuhle, abakhethayo basebenzise ubungcitshi babo,” kutsho uNdebele ngoLwesibili.
