uMthunywa
YiNtatheli kaMthunywa
UKUJOMBA kuyingxenye yempilo kodwa nxa sokunje sokusolisa yikho nje izakhamizi zelokitshini leMakokoba zilokhe zingelankani ngesiga selinye ijaha okubikwa libenge omunye ngengqamu esiswini kubangwa i 2 randi uMthunywa ukuzwile lokhu.
Kufike endlebeni zephephandaba leli ukuthi umetheswacala ovezwe ngokuthi nguMichael Mhlanga, 19, ohlala kusitalada sika10 Street ugwaze uMlungisi ngemva kokuba embuze ukuthi kungani ehlala emcela i2 randi.
Abasiki bebunda abahlala kulelilokitshi batshele iphephandaba leli ukuthi isehlakalo lesi senzakala ngeSonto kuyonale iviki ngehola lika8 ebusuku.
“Kujwayelekile kubontanga abasakhulayo ukuthi bacele imali ebantwini abazihambelayo. Bayabe becela imali befuna ukuthenga igwayi lezinye izidakamizwa.
“NgeSonto uMichael njengenjayelo wathi ebona uMlungisi edlula ngomgwaqo wamisa wamcela i2 randi. Lokhu kukhanya kwacaphula uMlungisi yikho laye waphendula ngolaka esithi kungani umetheswacala ehlala ecela imali ebantwini,†kutsho lumfakazi.
Kubikwa ngokucwayiza kweso umetheswacala wakhupha ingqamu esikhwameni wagwaza umamangala esiswini lasengalweni.
“Wamlimaza impela ngoba ezangaphakathi zasala zisegcekeni okuyikho okwenza izihlobo zakhe zabiza i-taxi zaphanga zamgijimisela esibhedlela seMpilo. Esibhedlela bafika bamthunga njalo lokhe elalisiwe,†kugcizelela lumfakazi.
Amapholisa kubikwa aziswa ngesiga lesi njalo asaphakathi kokudinga umkhondo kametheswacala yena owahle wadliwa ngumswenya.
Isikhulumi samapholisa koBulawayo, uInspector Mandlenkosi Moyo uthe udaba lolu lufikile ezindlebeni zabo njalo basaphakathi kokudinga umkhondo kametheswa.
