UCaliisto Pasuwa uphiwa uvava lwemota ye$69 000

14 Jan, 2016 - 00:01 0 Views
UCaliisto Pasuwa uphiwa uvava lwemota ye$69 000

uMthunywa

Nkosilathi Sibanda
KUKHANYA  umqeqetshi wamaWarriors uCallisto Pasuwa uzathi ukuma kancane ukukhala  ngokufuna iholo elingange $7 000, nanko phela usethengelwe uvava lwemota ebiza $69 000.

Imota le uzayithola nxa amaWarriors esevela kumqhugelwano weChan eRwanda, kutsho usomabhizimusi weHarare uWicknell Chivayo.

Sekuvuleke inhlanhla empilweni yalumqeqetshi, nanko usomabhizimusi omkhulu lo, uChivayo ubika ukuthi umthengele uvava lwemota ukuze aqhube kuhle umsebenzi.

Ebika enkundleni yokuxhumana i-Instagram, (ku-sir_wicknell) uChivayo uthe uthengele uPasuwa uhlobo lwemota yeToyota D4D ukuze umqeqetshi lo enelise ukwenza umsebenzi wokukhuza iqembu lesizwe lula.

“Ngikhiphe imali encane nje, i$69 000 kuphela izolo (ngoLwesibili) ngithenga iToyota D4D entsha engizayinikeza umqeqetshi uPasuwa. Ngikwenze lokhu ngenhliziyo yami yonke, lesi yisipho esiya kumqeqetshi wethimu yesizwe.

Uzathola imota yakhe esevela kuChan,” kutsho uChivayo ngehola lika-9.04 ekuseni.

Usomabhizimusi lo nguye owanikeza amaWarriors isipho se$1 miliyoni waphinda wabhadala isikwelede seZifa kuTom Saintfiet owayeqeqetsha iZimbabwe kuminyaka edluleyo.

UChivayo, odume ngelithi Sir Wicknell eHarare, uqhubekele phambili wathi: “Umuntu engaba lezigidi zamadola kodwa impumelelo ibonakala ngokupha lokuncedisa umphakathi. Loba ngithole ukuchothozwa ngalokhu engikwenzele iZifa, kumele kwazakale ukuthi angethuki lutho.

“Ngizakwenza konke okusemandleni ami ukuthi ngincede ekuphakamiseni inguqu yeZimbabwe. Le ngenye indlela yokubonga uMongameli uRobert Gabriel Mugabe ngenhlelo azisungulayo ezangiphathisa ukuthi ngisebenze nzima ngibe lemali enengi.”

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds