UBUNANDI ESOWETO. . . iNetOne iyazigqaja ngeBosso

UBUNANDI ESOWETO. . . iNetOne iyazigqaja ngeBosso

0 465

Nkosilathi Sibanda
INETONE ibika ingafihli ukuthi iHighlanders yilo lodwa iqembu elenza kuhle phakathi kwawo wonke eliwasekela ngemali.

Inkampani le isekela njalo iDynamos leCaps United.

Iqembu linye ngalinye lithola i$350 000.

Kulandela ukwenza kuhle kweqembu likaMadinda Ndlovu, iNetOne ithe isihlele ukuthi ibonge abantu abaqakathekileyo kunguqu-abalandeli lababukeli bemidlalo.

Kumbiko othunyelwe iphephandaba likazulu kuliviki, inkampani yeNetOne ithembisa ukuba bonke abazibiza ngokuthi ngabalandeli beqembu likanobhutshuzwayo iHighlanders bazathola ukuphakanyiswa ngosekelo yinkampani yeNetOne kulisizini.

Umaqhuzu walinkampani uLazarus Muchenje uthe nxa iqembu leHighlanders lidlala ibhola elijabulisa abantu bayakuthakazelela njengabahlawuleli beqembu. Uthe lokhu kuveza ukuba imali yabo isetshenziswa ngendlela efaneleyo.

“IHighlanders ngeyinye yamaqembu esiwasekelayo. Idlala kuhle ukwedlula wonke okwamanje, ngakho siyajabula. Ngithanda ukubeka emphakathini umbiko wokuthi sizancedisa ekuphakamiseni abalandeli beHighlanders ngendlela ezitshiyeneyo. Sizafika kubo bonke abasekeli bayo izwe lonke,” kutsho isiphathamandla lesi. IHighlanders liqembu elilebizo elikhulu. Ukuba yingxenye yalithimu kutsho okukhulu kithi.”

UMthunywa ukhulume loKenneth Mhlophe uMgcinisihlalo weBosso othe ukubambana kwabo leNetOne kuzaletha umehluko ozadala ukuthi iqembu linqobe iligi.

“Ukuba khona kweNetOne kuyisibonelo sokuba iHighlanders yenza kahle kunguqu njalo iliqembu amankampani afuna ukusebenzelana lalo. Siliqembu elaziwa ngokuqhuba inhlelo zayo ngobunono, ngakho nxa inkampani enjenge-NetOne isisekela, kutsho ukuba senza kahle.

“Kubalandeli bethu usekelo lwabo aluqhubekele phambili. Nxa abasekeli bethu kwezemali bebona ukubambana kwabalandeli, kuzenza kube lula ukuthi bahlale belathi,” kutsho uMhlophe.

SIMILAR ARTICLES

NO COMMENTS

Leave a Reply