uMthunywa
AMALUNGISELELO okwamukela uMongameli welizwe uKhomuredi Emmerson Mnangagwa kusasa asesezingeni eliphezulu.
UMongameli welizwe uzaqala avakatshele isibhedlela seKusileni ekuseni andubana ayehlangana lozulu enkundleni yeWhite City.
Lamuhla uMongameli welizwe ubeseSabelweni seMatabeleland South eGwanda lapho aqale wethula uhlelo lweCommand Livestock ngokusemthethweni ngokunika abalimi inkomo ezingu-600 andubana ayehlangana lozulu enkundleni yePelandaba.
UMinister of State for Provincial Affairs koBulawayo uKhomuredi Angeline Masuku ubikele intatheli kaMthunywa ukuthi amalungiselelo okwamukela uMongameli welizwe asezingeni eliphezulu.
“Ikhomithi elungiselela umkhankaso kaMongameli lo ibika ukuthi konke kuhamba kuhle njalo labantu abavakatshelweyo benxuswa ukuthi bazohlangana loMongameli welizwe bathi bazabuya ngobunengi babo bazozizwela abakuphathelwe ngumkhokheli wabo,” kutsho uKhmrd Masuku.
Kumkhankaso kaMongameli lo akunxuswa kuphela amalunga eZanu PF kodwa wonke umuntu ukhululekile ukuthi afike eWhite City.
Kubikwa kuzabe kulamabhasi azathwala abantu besuka endaweni ezehlukeneyo koBulawayo besiya enkundleni yeWhite City.
