uMthunywa
YiNtatheli kaMthunywa
IMIDLALO yebhola edibanisa amazwe akumhlubulo ongezansi yeAfrica eyeConfederation of Schools Sport in Southern Africa iyaqala lamuhla enkundleni yeWhite City.
Amazwe azaphatheka asefikile koBulawayo abalisa iBotswana, iNamibia, iLesotho leSwaziland. Abadlali bamazwe la bagcinwe eGames Village ekolitshini leHillside.
Ezinye izizwe kubikwa zithe azilamali yokuthumela amathimu, osekuyinto ejwayelekileyo kulumncintiswano.
Inkundla ezizatshenziswa zibalisa iHartsfield (rugby), iWhite City (netball), iBarbourfields (inguqu), iMilton (volleyball), Bulawayo Athletics Club (ithenisi).
Umncintiswano wemidlalo yebhola lo ngowesibili olesisindo esikhulu ukuthi uqhutshwe edolobheni lakoBulawayo lokhe kwenziwa owama-African Union Sports Council Region 5 Under-20 ngoMpalakazi nyakenye.
Ihlandla leli ngelemidlalo le esebenzisa ibhola ebalisa inguqu, i-volleyball, i-rugby, ithenisi lokuqaga.
Isikhulumi seqembu leZimbabwe uArthur Maphosa ubikele iphephandaba likazulu ukuba imidlalo le ivulwa okusemthethweni lamuhla emini nguLazarus Dokora umphathintambo wezemfundo.
“Konke sekulungile ukuthi siqale imincintiswano yethu. Amazwe asekhona eGames Village yiBotswana, iNamibia, iSwaziland leLesotho.
“Imidlalo yalonyaka izavulwa ngokusemthethweni ngumphathi wezemfundo kuHulumende uLazarus Dokora.
Imidlalo le iphela ngeSonto lapho okuzakhuluma khona uAndrew Langa ophethe ezemidlalo.”
UMaphosa uthe ithimu yakuleli bayiqonqosele ukuthi iphakamise isisindo selizwe ngokubhuqa wonke amazwe ancintisayo.
Iphephandaba likazulu livakatshele iqula labadlali besizwe asebengene enkambeni yokulolonga esikolo seNorthlea High ngoLwesithathu.
Umkhokheli wethimu yeZimbabwe uCynthia Khumalo ubike ukuba imidlalo le bayayisekela ngoba iyimidlalo elakho ukukhuthaza abadlali ukuba badlale ngokuzimisela ngoba bengahle bathole amaqembu angabahawukela besakhula.
Uthe iqembu lesizwe seliphakathi kwamalungiselelo loba nje kulabanye abadlali ababanjwe yimidlalo yama-youth games aseMutare okwamanje.
“Imidlalo le ize ngesikhathi abadlali bethu befutha ngokuncintisa. Sesiqalisile ukulolonga lakunkundla ezizasetshenziswa ukuncintisa. Njengabanikazi bendawo kumele sinqobe kalula ngoba inkundla sizijwayele,” kutsho uKhumalo ophinda abengumgcinisihlalo wenhlanganiso yeNational Association of Primary Heads (Naph).
UKhumalo ubike ukuba kulithuba elihle lokubana abadlali bazithengise ngokutshengisa ubungcitshi babo emidlalweni.
