uMthunywa
Ethel Ncube
KULENDODA yesigabeni sakoChireya eGokwe ebisihluphile ngokufakela abantu etshwaleni ephendukelwe ngumuthi wayo nanko phela iphethe ibulawa yitshefu ebiyifakele osobhuku.
Umuyi uKarapate okungasatholakalanga ibizo lakhe, obeleminyaka engu-60 ehlala ngaphansi kukasobhuku uTaka ngaphansi kwenduna uChireya ubhubhe ngoMvulo ngeviki ephelileyo esemnyama tshu ngemva kokunatha utshwala obuletshefu abeyifakele osobhuku ayenatha labo.
Kubikwa uKarapate ubesehluphile ngokufakela abantu itshefu yesibindi sengwenya etshwaleni kungakho ngalelolanga kubikwa wabonwa ngabanye eyifaka kungakho wathi eyelahla amanzi basala bemtshintshela inkomitsho uthe ephenduka wanatha utshwala obuletshefu.
Induna uChiya Chireya uchaze ukuba uKarapate uphendukelwe ngumuthi wakhe.
“Undoda lo ubeselodumo olubi lokuhamba ebulala abantu, yikho nje ecine ezibulala ezama ukuqeda abantu etshwaleni,” kuchaza induna uChireya
Uqhubekele phambili echaza ukuthi umuyi ukufakela besekungumsebenzi wakhe ikakhulu ungamkhuba.
“Mhla wokufa kwakhe wayenatha labanye belihlekana nje, wasefaka itshefu enkomitshini yomunye kanti bavele labo bathiyile. Ngokuthula engananzeleli badobha inkomitsho bamqhubela wasenatha wahle wakhala ngesisu wafela khonapho.
“Esefile yikho lapho abakhuluma khona ukuthi bamnike utshwala akade ebufake umuthi wokubulala ngoba bezwe ekhuluma kwenye indawo ukuthi kulomunye afuna ukumbulala. Ngikhuluma nje ubekiwe ngenxa yezenzo zakhe ezimbi,” kuphetha induna uChireya.
