Uncategorized

Ubulala umngane kubangwa umhlanga wegwayi

21 Mar, 2019 - 00:03 0 Views
Ubulala umngane kubangwa umhlanga wegwayi

uMthunywa

Thokozile Mbedzi

ZISELE zikhuza umhlola izakhamizi zeMarula ePlumtree ngemva kokuba enye indoda ibulele umngane wayo andubana idliwe ngumswenya kubangwa umhlanga wegwayi.

Umetheswacala uMehluli Moyo oleminyaka engu-48 ubulele umngane wakhe uBehaviour Moyo ngoLwesibili kuviki ephelileyo ngemva kokuxabana bebanga igwayi ezitolo zePlumtree.

Kubikwa ababili laba bafika ezitolo bonke lapho ababesiyamelela unina kaMehluli obemele ehle kule indawo. Ngesikhathi besamlindele, kubikwa bakhipha imihlanga emibili babhema kodwa uMehluli waphangisa ukuqeda owakhe okuyikho okwadala ukuthi athi usefuna okaBehaviour ngoba esithi yena wome kakhulu.

UBehaviour wala kungakho uMehluli wasebumba  iqhinga lokuthi ayemtshengisa imbongolwane engemva kwamavinkili.

Omunye walabo ababekhona kusenzakala uMnumzana Nkanyiso Mloyi uthe ababili laba bafike kukuhle kungakhanyi ukuthi kungacina kukubi. 

“Into ezwakale beyibanga ligwayi kodwa asizange sicabangele ukuthi kungacina sokulesidumbu phansi ngoba basukuma njalo bonke besiyatshengisana imbongolwane. Lathi kwangasikhathazi ngoba sibabone bengabantu banye. Sethuke omunye obezihambela ethutsha ehlaba umkhosi evelela lapho ababili laba ababeqonde khona esithi kulesidumbu.

“Sathi sisiyakhangela sathola kunguBehaviour kodwa vele uMehluli wayesedliwe ngumswenya,” kutsho uMnu Mloyi.

Omunye wabathengisayo ongazange athande ukuchazwa ngebizo uveze ukuthi ababili laba bahlala bebuya bezonatha utshwala kodwa okwenzakeleyo labo kuyabethusa.

“Ababili laba bahlala bebuya ukuzonatha utshwala lapha babuyele ngekhaya kukuhle,  lamuhla angazi ukuthi ngumoya bani osuke wangena kuMehluli wamsebenzisa kubi kanje.”  

Isikhulumi samapholisa esabelweni seMatabeleland South uInspector Philisani Ndebele ebuzwa ngodaba lolu uvumile wathi solufikele ehofisini yakhe.

“Udaba lwendoda yeMarula ebulele umngane wayo isifikile ehofisini kungakho sicebisa uzulu ukuthi nxa kulokungezwani adinge uncedo kubakhokheli besigaba abafana lezinduna labosobhuku kulokuthi bacine belimazana.

“Umsolwa kakabotshwa kodwa sicela ongabe elolwazi lwalapho akhona abikele amapholisa aseduzane laye,” kuphetha uInsp Ndebele.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds