Ubuhwaba belifa

28 Jun, 2018 - 00:06 0 Views
Ubuhwaba belifa

uMthunywa

Phumulani Mpofu

Kubuhlungu kanganani ukubona abantwana besehluleka ukufinyelela amalungelo abo ngenxa yobuhwaba bezihlobo.

Umuntu umane abone kulithuba elihle lokuthi avune lapho angalimanga khona nxa isihlobo sesithe sadlula emhlabeni, lalapho okungafanelanga khona umuntu uhle alume owangaphansi atshone esehla esenyuka lezitalada ukuze athole ilifa elingayisilo lakhe. Abantwana bomufi bona basuke babe yisikhali sokuthi umuntu athole akufunayo.

Kuleli iviki ngithanda ukuthi sixoxisane ngendaba esihluphile emphakathini, ehlukumeza abantwana njalo ibabhidlizela ikusasa labo. Emalangeni ambalwa adluleyo ngixoxisane lesakhamuzi seNtabazinduna okuthiwa nguMgcini Nyathi.

UMnu Nyathi yindoda eleminyaka engamatshumi amathathu lambili obethethe uSihle Moyo ngomtshado wesintu, laba bobabili babusiswa ngezingane ezimbili kodwa-ke ngetshwa uSihle wathi eqeda ukubeletha ingane yakhe yesibili wadlula emhlabeni. Lokhu kwabangelwa yikuthi ekubeletheni kwakhe ehlinzwa akuzange kwenziwe izinto ngendlela. Ngakho-ke esikhathini sokuthi kube lokujabula koNyathi kwaba lesililo lanxa nje inhliziyo zaba lokududuzeka ukuthi ingane uJehova uyiphephisile.

Endaweni yokuthi abakoMoyo babambisane lomkhwenyana ukuze lezizingane zikhuliswe ngendlela efaneleyo lanxa unina wayesebhubhile bona baphenduka ibilebile esilondeni. Umnewabo kamufi okuthiwa nguNkulumo Moyo wayesefuna ukuthi aphiwe imvumo yokuthi agcine abantwana (applying for custody), kuthi-ke uyise wabantwana abanakekele ngokusemthethweni (maintenance). Phezu kwakho konke lokhu umalume wabantwana ngosegijimela eMpilo lapho okwakusebenza khona udadewabo, athi nguye okumele aphiwe izimali zomufi (benefits) njengoba nguye owayesezahlala labantwana. Kuthi kunjalo uNkulumo labanye odadewabo bakamufi ngasebequkula impahla zonke endlini kamkhwenyana betsho bethi yizithukuthuku zikadadewabo, ngeke zidliwe ngumuntu nje!

Lanxa wayelokhe esesililweni uNyathi akazange agoqe izandla ebona yonke le imihlolo isenzakala, watsho esiya emapholiseni. Abomthetho kabachithanga sikhathi, bayithathela phezulu indaba yokuthathwa kwempahla, bababiselisa ngoba kwakungekho emthethweni ababekwenzile.

Kanti njalo lemthethwandaba kabayivumanga indaba kaNkulumo eyokugcina abantwana ngoba bekuvele kungelamuntu wesifazana ongakwanisa ukugcina izingane, yena ekwenza lokho wayethembe omunye wabodadewabo, okwatholakala ukuthi akahlali lapha kweleZimbabwe. EMpilo lakhona bamdanisa uNkulumo, njalo bamxwayisa ukuthi nxa engabuya ngeqhinga lakhe elingavumelekanga emthethweni bazambophisa. Amaqhinga akhe wonke akasebenzanga.

Okuhluphayo-ke manje yikuthi incwadi yokufa kukaSihle ayikathathwa. Lanxa umkhwenywana kunguye owasayina i-burial order izihlobo zikaSihle zahamba koMsitheli zafika zaqamba amanga zathi i-burial order ilahlekile, zisenzela ukuthi ziphiwe incwadi yokufa kukaSihle (death certificate). Lokhu kwabangela ukuthi uNyathi onguye ophethe i-burial order ehluleke ukuthatha incwadi kamufi ngoba kwakumele abuye lesihlobo sikamufi njengoba incwadi kade sokuthiwe ilahlekile yona ikhona. Kodwa njengoba kungelabudlelwano obuhle phakathi kwezimuli ezimbili abantwana sokuyibo abancindezelekayo ngoba kufuneka incwadi yokufa kukaSihle (death certificate) lesihlobo sikamufi ukuze abantwana bathathelwe incwadi zokuzalwa.

UNyathi uphelelwe, kakwazi ukuthi enzeni ngoba phela abakwabozala abafuni kumnceda, bona bakhalela ilifa kulokuthi balungiselele ikusasa labantwana. Abantwana kumele babhale umhloliso kodwa kabenelisi kukwenza lokhu bengelazo incwadi zokuzalwa.

Ngalokho ngithanda ukuxwayisa umphakathi ukuthi singazicabangeli sodwa kodwa kasibeni lonembeza, ukufa kwesihlobo kungabi lithuba lokuthi umuntu athole inotho, njalo zonke izinto zilendlela yokwenziwa ngokusemthethweni walapha kwelakithi, abantwana kumele sibavikele sibanakekele njengoba lathi abazali bethu basikhulisa saze saba ngabantu abadala. Abantwana yikusasa lelizwe lethu, pho-ke nxa bengafundanga ilizwe lethu lizaba lilizwe elinjani eminyakeni ezayo? Lo ngumlandu wethu sonke badala.

Umlobi utholakala kunombolo zocingo ezithi 0773195055 lakukheli ethi [email protected] lakuFacebook page ethi Trinity Project PVO kanye lakuwebsite

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds