uMthunywa
KULEQULA lezangoma elihambe esikolo seSunwards Park High School eBoksburg indawo eseEkurhuleni kweleSouth Africa lisiyatshiya umlayezo omqoka.
Izangoma lezi zibikele iphephandaba le Daily Sun ukuba zihambe kulesi sikolo ngoba zifuna ukutshela ababalisi bakulesi sikolo ukuthi bangaphathi ngochuku kumbe ukubiza izangoma ngamabizo angayisiwo afana lelokuthi dimoni.
Izangoma lezi zifika kulesi sikolo nje kungenxa yokuthi bezifuna ukuyatshengisela usekelo komunye umfundi oyisangoma ofunda ugiredi 10 kulesi sikolo.
Umfundi lo obizwa ngokuthi Bongiwe Lwandle Ngobese oleminyaka engu-15 yokuzalwa uyisangoma njalo abazali bakhe bakhonona ngokuthi ababalisi kanye lomphathisikolo bahlala behlambaza indodakazi yabo ngokugqoka kwayo amangqongqo esikolo. Kubikwa abanye bayake bambize ngelokuthi dimoni.
UBongiwe watshiya isikolo okomnyaka owodwa nyakenye ukuze athwasiswe njalo uphenduke esikolo ekuqaleni kwawonalo umnyaka.
Inhlanganiso yezangoma ibike ukuba isikolo siqinisekise ukuthi asisoze sixotshe uBongiwe esikolo njalo sizazama ngazo zonke indlela ukuba angabandlululwa kumbe ukubizwa ngamagama amabi.
Omunye wezangoma lezi uSimphiwe Manana uthe: “Kusizwise ubuhlungu ukuzwa ukuthi umntwana lo ubebizwa ngelokuthi dimoni esikolo njalo esethuselwa sikhathi sonke.
“Isikolo siwalandule amahemuhemu okuthi uBongiwe uyabandlululwa bathi bacela nje ukuba avale amangqongqo akhe ngebhulawuzi elemikhono emide.”
“Uma bekuphinda lokhu okusilethe lapha sizaphenduka njalo kulesisikolo ngeke sekele umntwana ehlukunyenzwa ngenxa yobizo lwakhe.”
Ngeviki ephelileyo esinye isikhulumi sezemfundo eGauteng sathi kwaba lomhlangano phakathi kwabazali bakaBongiwe kanye lesikolo, lapho okwavunyelwana khona ukuthi azigqokele amagqongqo akhe kodwa kumele awafihle ngebhulawuzi elemikhono emide
