uMthunywa
Gladmore Ncube
KULEJAHA lePlumtree esigabeni seBhembenene elikhulelwe yimizwa lahamba layabulala indlu yejaha elimthathele intombi ngemva kokwaliwa, uMthunywa ukuzwile lokhu.
Iphephandaba likazulu lizwe ukuthi uCharles Mdluli wehluleke ukuzithiba ngemva kokwaliwa yintombi yakhe, uNkosazana Zandile Moyo wayabhidliza impahla lendlu kaMnumzana Brian Mabaleka obesethandana loMoyo.
Intatheli ikhulumisane loMnumzana Carlos Mthethwa obikele uMthunywa ukuthi udaba lolu luliqiniso.
“UMdluli udilize indlu yomuntu yokulala ezondele ukuthi usemthathele intombi. Mina ngesikhathi ngisakhula ngangisazi ukuthi umuntu engakwala uyavuma ngoba uyabe esethole ijaha elingcono kulawe njalo elimenzela ngcono kulawe, ngakho-ke kumele ukwamukele.
“Simangele thina ngoLwesine olwedlulayo sibona abantu bexabana kubangwa intombi. UMdluli wakhulelwa lulaka wahamba ephethe isagila wafika wabhidliza ixhiba likaMabaleka esithi ufuna ukubona ukuthi bazalala ngaphi njengoba sedilize indlu,” kuveza uMnu Mthethwa.
“Okuhle yikuthi udaba lolu aluzange luhanjiswe emapholiseni ngoba unina kaMdluli wathi uzabhadala izamende lenhlabathi yokwakha indlu le edilizwe ngumtanakhe,” kutsho uMnu Mthethwa.
Intatheli ikhulumisane loNkszn Moyo ngaloludaba othe uMdluli kaboni ukuthi uzondeleni ngoba okwenza waliwa yikuthi wayeleyinye intombi.
“Angisiboni isizatho sokuthi uMdluli uzondeleni ngoba wangenza isithutha wadinga eyinye intombi ehlala koMatiwaza obehlala esiyalala khona. Mina ngabona kungcono ukuthi ngimale ngidinge lami umuntu ozangiqakathekisa angithande ngingedwa,” kuchaza uNkszn Moyo.
UMdluli ebuzwa ngaloludaba uthe wakhulelwa lulaka kwaphambaniseka.
“Ngasuka ngakhulelwa lulaka kwaphambaniseka kakhulu njalo ngizabhadala lapho engona khona,” kutsho uMdlula.
Imizamo yokukhulumisana loMnu Mabaleka yehlule ngoba kuthiwa kalacingo.
