uMthunywa
Ethel Ncube
KULENDODA yeGwanda eBhalula esele isezikweledeni ngemva kokuthela enye ngomgqomo wotshwala kubangwa umfazi.
UJotham Nare uthele uMnumzana Mphathi Nyoni ngotshwala ngeviki ephelileyo kubangwa ukuba uthandana lomkakhe.
Esinye isakhamuzi esikhulume loMthunywa uMnumzana Mpumelelo Khabo uveze ukuba bacina bengasanathi kuhle utshwala sebuchithelwe phansi bonke.
“Sasizihlalele sinatha komunye umuzi lapho okwakuphekwe khona utshwala kwafika uNyoni wathi kuNare uhlezi etshwaleni yena uvela kumkakhe.
“Ngobuhlungu langokuzonda uNare wathi lothu, waphakamisa inkonxa yotshwala wabhabhathiza ngayo uNyoni watshaya isicathulo andubana amtshele ukuthi bazahlangana ekhoneni lentaba ngelinye ilanga,” kubika uMnu Khabo
Intatheli ibuye yaxhumana lesinye isakhamuzi uMnumzana Katlego Ndlovu ochaze ukuba babukela umbhabhathizo wamabele.
“Abantu bayadelela sibili, ungakhonjwa ngumfazi womuntu ubuye uzotshela umnikazi uyabe uthembeni.
UNyoni wathola sizidlela amabele wafika wathi kumnikazi womfazi ulapha mina ngivela kwakho. Lowana ngokucaphuka wamqunga ngomgqomo wonke wotshwala wamthembisa ukumtshaya,” kubika uMnu Ndlovu
Ekhuluma lentatheli uNyoni uvumile ukuba bamthela ngotshwala.
“Mina ngakhuluma ngisithi ngiyasoma laye ngomkakhe kanti yena ungicabangela okunye, umkakhe ngangimbone ngizidlulela, okunye okunengi angikwazi,” kubika uNyoni.
Iphephandaba likazulu likhulumisane loMnu Nare onguye owaqunga omunye ngotshwala.
“Mina ngibuhlungu ngomkami ukuthi enye indoda ingamane ingene emzini wami izenzele umathanda yikho ngimthele ngotshwala,” kubika uMnu Nare.
Imizamo yokukhuluma loNkosazana Duduzani Ncube onguye obebangwa yehlule ngoba kuthiwa uphumile.
