uMthunywa
YiNtatheli kaMthunywa
NGESONTO mhlaka 28 kuZibandlela kwehle iyezi elimnyama kuhlangothi lwezintatheli zindaba kuleli ngemva kokutshona kukaCornelius Luphahla obesebenzela inkampani yeZimbabwe Newspapers edinda iphephandaba likazulu uMthunywa.
Umuyi uLuphahla obesazakala ngokuthi “Mlisa”, “KaNdaba” “Msizi” kumbe “iNduna” ngendlela abeziphatha ngayo ubeleminyaka engu-26 yokuzalwa. Ubhubhe ngeSonto emini koBulawayo. Ungcwatshwe ngoLwesibili esiqintini seMafa eLupane.
Kumbuthano wokubeka iqhawe eliyintatheli leli ngoLwesibili, inengi labantu limchaze njengendoda ebiqotho njalo ibilekusasa elihle kumsebenzi lo.
Okhulume emele inkampani yeZimpapers uDumisani Nsingo, oyintatheli uthe umuyi ubelijaha ebelisebenza gadalala ukuthuthukisa isabelo seMatabeleland North.
“Thina njengeZimpapers silahlekelwe kakhulu yisisebenzi ebesisebenza gadalala kuphephandaba likazulu. Indoda le ibilolwazi olukhulu ngomsebenzi esiwenzayo kanye lamasiko.
“UCornelius Luphahla ubengumthombo wolwazi kithi sonke emsebenzini ngoba ewazi amasiko esiNdebele, amanye akhona ubewakhipha kuphephandaba ukuze uzulu afunde. Besikhangelele ukuthi ngolwazi alalo langomsebenzi awenzayo enelise ukuthuthukisa iMatabeleland North ngokukhankasela ingqubekela phambili,” kutsho uMnu Nsingo.
Intatheli ezisebenze laye kuMthunywa zibike ukuba inhliziyo zidabukile.
Intatheli yezemidlalo kuMthunywa uNkosilathi Sibanda uthe: “Okusidabula inhliziyo yikulahlekelwa ngumfowethu ebesikhangelele kuye. Usitshiye singalindelanga. Kusukela ngesikhathi ngisibamazi, kuMthunywa, uLuphahla ubebonakala eyintatheli uqobo. Ubengumuntu okhululekileyo, owayelothando lokuncedisa asebenza labo.
“Ubeyintatheli ebikhankasela ingqubekela phambili yesizwe samaNdebele. Kuntanga yakhe akula owayehlosa ukugcina lokukhankasela amasiko esizwe sikaMthwakazi. Engizahlala ngimkhumbula ngakho yikuthi umuntu kumele azi ukuthi uvelaphi. Ubeyithanda iBosso njalo,” ngamazwi kaSibanda lawo.
Intatheli uArnold Ndlovu uthe: “Ukuhamba komuntu ofana loLuphahla yikulahlekelwa kakhulu hatshi ngokomsebenzi kuphela kodwa langolwazi ngezamasiko. UMsizi ubengumuntu oziqhenya ngemvelaphi yakhe njalo engumuntu ogxile kwezamasiko kakhulu.
UMnumzana Gladmore Ncube obesebenza laye njalo uthe: “oKaNdaba ubengumfowethu lomngane omkhulu.
ULuphahla ungitshiye ngedwa hatshi ngokuthi nguye yedwa oseduze lami kodwa ngokuthi akekho ozabuya afane laye.
UMthunywa ukhulumisane loAbinock Luphahla ongumfowabo oveze ukudana ngokulahlekelwa ngumfowabo.
“Thina njengemuli yakoLuphahla silahlekelwe liqhawe elikhulu okumangalisayo. Into le yenzakale ngesikhathi singalindelanga ngoba besikhangelele ukuthi uCornelius uzancedisa ukuthuthukisa imuli kanye lesigaba sethu.
“Umuyi ubeyindoda elekusasa ekhanyayo njalo elombono. Ubefundile umfowethu njalo uqeqetshe ngomnyaka ophelileyo besikhangelele ukuthi azithuthukise, kodwa iNkosi ivumile,” kuphetha uMnu Luphahla.
