uMthunywa
Vusumuzi Ndlovu
KULIVIKI sigijima phezulu kwendikimba yokuphumelela kwabesifazana kanye lentandokazi zakithi, uLorraine Maplanka Stot, Novuyo SeaGirl njalo sihlonipha umama uDorothy Masuka ositshiye ngeviki edluleyo. Kuhle ukuzwa amazwi asipha ithemba njalo asiqinisayo evela kubomama, abayibo abaluzwisisa ngcono loludaba.
ULorraine Maplanka Stot usesidukwini emisakazweni ekhonapha elizweni ngengoma yakhe uBekezela. Lingoma uyisungule kudlalade lakhe ngemva kokuphumelela kwengoma yakhe ethi Makadunyiswe. Lingoma ikhuluma kakhulu ngokubaluleka kwethemba ezikhathini lezi esiphila kuzo.
Ngempela ithemba alibulali, ngakho ukhuthaza ukuba sibekezele ngoba okuhle kusendleleni, elakusasa lihleli likhona. Uthi loba kungaba nzima njani, yena kalahli ithemba loba umhlaba ungamlethelani.
ULorraine ngumculi wokholo odume ngeWomen of Valour kanye laku-Outfit Band, lapho ayecula eloSam Siwela lomkakhe uBlessing Stot. Useke wasebenza labanye abaculi abalodumo abafana loTakesure Zamar Ncube, lumsebenzi wakhe wamnika izicoco ezimbalwa. Ngokulalela nje lingoma uyezwa ukuba uLorraine lokho akuvezayo kuvela ekujuleni kwenhliziyo.
UNovuyo Seagirl kadeli njalo kukhangeleka esemsebenzini ngomculo wakhe. Emveni kwezicoco azibuthelele ngo AEIOU, usesungule enye ingoma uBambelela eloLwandle Nomvula. Kulingoma babonisa ukuqakatheka kokuqinisela ehambeni lwempilo nxa ufuna impumelelo ngomsebenzi ongabe uyawenza empilweni.
ULwandle ngudade kuVuyo, njalo nxa behlangene balamachacho amahle njalo aluluju ezindlebeni. Umhlobo womculo abawusebenzisa lapha yilowo owe-house. Umbiko uzithintela ngokubambelela kuphupho lakho lokungakhathaleli ukusebenza.
Esigabeni sokucina, sizakuhlonipha uMam’ Dorothy Masuka, olomsebenzi wakhe womculo oligugu kusukela emzabalazweni yezizwe, ikakhulu khonapha ekhaya azalelwa khona leMzansi Afrika. Ube ngumculi wodumo owakhona ukuba sezilinganisweni labanye abafana loMiriam Makeba, Hugh Masekela Thandi Klaasen, Letta Mbulu labanye abavula amasango wokuba singabansundu sikwazi ukuziqhenya ngobuntu bethu.
Ingoma zakhe ezilodumo zibalisela uPhatha Phatha, MaGumede, Sala Ulandela, Chimanga, Mzilikazi, Khawuleza, Nhinngikirikini, Hamba Notsokolo, Gona RaMaChingura lezinye ezinengi. UMam’ Dorothy uke wasebenzisana lamaqembu afana leJobs Combination njalo wahamba amazwe ecula iTownship Jazz okweminyaka engamatshumi ayisithupha. Lala ngoxolo njalo siyabonga imisebenzi yakho lemfundiso.