uMthunywa
Charity Moyo
ZISELE zikhuza imihlola izakhamizi zeMberengwa eGaha ngemva kokuba enye indoda ebanjwe ilomfazi womnikazi iveze ukuthi ifuna ukumthatha.
Isehlakalo lesi senzakale ngoMvulo kuviki ephelileyo.
UProud Mapiravana oleminyaka yokuzalwa engu-32, utshiye umthethwandaba wedale lenduna uMketi bebambe owangaphansi ngemva kokuveza ukuthi ufuna ukulobola unkosikazi womnikazi.
Kuzwakale ukuba idale leli labakhona ngemva kokuba uMapiravana ebanjwe xhaka ngaphansi kwentatshana eloNothando Moyo (29) bezincindela uluju lwemvelo.
Umfakazi obikele uMthunywa onguye owabona limbedumehlwana uNkosazna Rita Nkiwane uveze ukuthi wabona lokhu ngesikhathi ilanga selisiya ngomtsha wendoda esiyatheza inkuni. Ubuye waveza ukuthi wathi elokhu esalibele wabona abantu ababili bengaphansi kwentaba le, uthe nxa esesebucwadlana labo watshaywa luvalo ngoba enanzelela ukuthi ngabantu abaziyo.
“Ngangizihambela ngingagqize qhakala ngesikhathi ngibona ababili laba ngaphansi kwentaba.
“Ngilokho ngisamangele ngabona ukuba abantu laba babengagqokanga, okwangizwisa ubuhlungu yikuthi umfazi engambona lapho wayengumkamfowethu,” kuchasisa uNkiwane.
Umfakazi lo uveze ukuba okwamenza waveza indaba le yikuthi akuzange kumjabulise ukungaziphathi komkamnewabo.
Kubikwa umkaMoyo wayengekho eseGoli lapho asebenza khona, ngakho wahle wabikelwa ngodaba lolu okuyikho okwabangela ukuthi kubikelwe usobhuku wesigaba.
Kuvele ukuthi usobhuku wathi ethonisisa indaba le uMapiravana waveza ukuthi ufuna umkaMoyo abengumkakhe njalo wayezimisele ukubisela amalobolo wonke ayekhitshwe nguNkiwane.
Kuvele ukuba udaba lwabanzima kusobhuku ngakho lwadluliselwa edale lenduna.
UMthunywa uxhumane losobhuku wesigaba lesi uMnumzana uElliot Ncube yena oveze ukuba indaba le iliqiniso.
“Ngemukela indaba enjalo kodwa yaba ngaphezu kwamandla ami ngoba uMapiravana wayesithi ufuna ukuthatha inina leli, ngokunjalo ngayidlulisela enduneni,” kutsho uSobhuku uNcube.
Kuzwakale njalo ukuthi laphambi kwenduna uMapiravana wenza isicelo esifanayo.
Intatheli ikhulumisane loMapiravana yena oveze ukuthi kuliqiniso lokho njalo angeke akulandule ngoba ludaba osoluke lwahlalelwa phansi.
Uqhubekele phambili esithi okumenza afune ukuthatha uMoyo yikuba sebeleminyaka eminengi bethandana njalo bathandana kudala besakhula.
“Kuliqiniso sibili lowomfazi ngiyamthanda ngenhliziyo yami yonke.
“Ngibona kungcono ukuba uNkiwane ngimbisele inkomo azikhuphayo mina ngimthathe ngoba kuzakubanzima ukuthi ngikhuphe inkomo zokuhlawula umuntu engingahlali laye,” kuveza uMapiravana.
UMthunywa uxhumane loNkiwane yena othe kalankani ngesenzo sababili laba kanye langamagama akhulunywa nguMapiravana.
“Ngabizwa ngisemsebenzini ukuze ngizozizwela ukuthi kuhamba njani, ngimadolonzima ngesinqumo esifuna ukuthathwa ngulundoda.
“Angila engingakutsho nxa bonke befuna ngizakwenza njengokuthanda kwabo,” kuphetha uNkiwane.
