UBanda ungena emzileni

UBanda ungena emzileni

0 88
UGift Banda

YiNtatheli kaMthunywa
AMALUNGA enhlanganiso yeZimbabwe Football Association (Zifa) asethole ithuba lokusebenzisa ilungelo lawo lokuvota ngokugcweleyo nanko phela uGift Banda usevunyelwe ukuncintisana lo-Omega Sibanda kusikhundla sokuba ngumgcinisihlalo walinhlanganiso.

IZifa ibike kuliviki ngesiphangiphangi kukhasi lobulembu ukuba loFelton Kamambo uzancintisa uPhillip Chiyangwa kukhetho lukamongameli mhlaka 8 kuMpalakazi.

Umbiko lo uvele kuVusilizwe Vuma umgcinisihlalo wekhomithi ephethe inhlelo zokhetho. Lokhu kuze ngesikhathi kungacatshangelwa ukuthi ikhomithi kaVuma ingavumela ukuncintisa kukaBanda loKamambo kulandela ukugconwa kwabo ukuthi akufanelanga bangene kukhetho.

Kubalandeli labacubunguli bebhola lenyawo, bekusaziwa ukuthi uChiyangwa loSibanda bazangena bethelile, kungela obangisayo.

UVuma uchaze ukuthi izikhalazo zokuncintisa kukaBanda loKamambo aziphathwanga ngendlela eqondileyo ngaphansi kwesiqephu somthetho uArticle 12, Subsection 3 Electoral Code.

“Ikhomithi yezokhetho lweZimbabwe Football Association ibika ukuba izikhalazo zikaGift Banda loFelton Kamambo azibanjwanga ngendlela, nxa kulandelwa uArticle 12 kuSection 3 we-Electoral Code, ngakho-ke bobabili sebevunyelwe ukuncintisa kukhetho lweZifa . . . ,” kutsho umbiko kaVuma.

Kulumbiko kuthiwa ukhetho lwamalunga ekhomithi ephezulu luzaqhutshwa mhlaka 1 kuMpakazi. Phakathi kwalabo abafuna ukuvotelwa kulabosaziwayo abakhokhela inguqu kusibanga esiphezulu, kumaqembu ePSL labanye abaziwa bengabacubunguli bomdlalo emsakazweni. Iqula leli liloSugar Chagonda, Mlungisi Moyo, Stanley Chapeta, Rodrick Chamunorwa Chiwanza, Phillemon Machana, Bryton Malandule loBarrymore Manandi.

SIMILAR ARTICLES

0 73

NO COMMENTS

Leave a Reply