uMthunywa
Salala singazivikelanga
Sabona Khulu, ngilethemba uzenelisa ukunginceda. Ngeviki ephelileyo ngalala lejaha engahlangana lalo ephathini singazivikelanga. Umuntu lo kangimazi yikuthi nje sasinathe okudakayo okwenza sathaba kakhulu saqala ukubambabambana ngacina ngisiya endlini yakhe laye. Khathesi ngihlezi evalweni Khulu ngoba ngamane ngavuka ekuseni ngazihambela ngakithi angizange ngikhulume laye. Sengisesaba ukuthi mhlawumbe ngingabe sengizithwele njalo sengibambe igcikwane lengculazi. Angazi ukuthi ngiqalisele ngaphi kumbe ngiqonde ngaphi. Ngicela ungicebise Khulu.
Impendulo
Mzukulu esintwini kuyazila ukuba umuntu abengumhlambi kazelusile nje, ohamba ubotshwa iganga lonke. Kuyadingeka mzukulu ukuba uhambe uyekwenza okunengi sibili, okugoqela ukuba uyezikhangela ukuba awuzithwalanga, nxa uzithwele ubuyele kulo ubaba uyemlandisela ngengozi eyavela ngesikhathi lilonke. Okunye kuyadingakala ukuba uhambe uyohlolwa igcikwane lengculazi mzukulu, ukuze wenelise ukuphatha impilo yakho ngemfanelo. Lokhu kuzaqeda umzwangedwa wakho, uphile impilo ekhululekileyo. Nxa ungakwenzanga konke lokhu uzabe udlela evalweni kube kanti kwesinye isikhathi akulalutho wesaba nje umnyama ongelampisi. Ngithemba uphume lesifundo esikhulu mzukulu, kukho konke lokhu. Impilo yikuzibamba hatshi ukunika wonke muntu umzimba wakho.
Ngenzenjani ukuthi ngiphinde ngimthande?
Ngicela lingisize lapha, ngihlala lomkami silomntwana oyedwa. Umkami wangijolela 3 years back, khonapho silungiselela ukuthi ngizithwale. Khulu angizange ngisazithwala, inhliziyo yami yahle yabamnyama, since khonapho vele angisamthandi njengakudala. Waxolisa sibili kodwa akuphumi enhliziyweni yami Khulu, ungenzela konke engikufunayo kodwa mina hatshi bo uthando kalusekho. Khulu lokuya emacansini ngilakho ukuqeda inyanga yonke ngingezwa imizwa yokuya emacansini. Khulu ngenzeni ukuthi ngiphinde ngithande lindoda? Ubefuna ukungenzela i-party encane ngalile, ngiphambanisile yini ngokwala ngoba yena usengizondela, but yena kakwazi ukuthi angizange ngaxola. Ngenze njani uthi lami ngibe-happy njengabanye abafazi, kuyangidla okuyinto kwakhona, ngicela lingisize.
Impendulo
Mzukulu, umkakho wazehlisa phambi kwakho, waxolisa ngomoya wakhe kunye langezenzo zakhe. Kuyadingeka lakuwe ke ukuba uzehlise mzukulu, uvule inhliziyo yakho, yamukele uxolo oluvela kuye njalo umethembe ngoba ubonisa ukuzisola ngesenzo sakhe. Nxa kulokhu kulethumba elifuna ukukhanywa, mtshele mzukulu ukuze azi iqiniso ngawe. Izolo liyembelwa mzukulu, lenhliziyo yakho kayibentsha imumathe uthando, umnikeze konke njengalokhu obukwenza izolo. Ikhiye yikuthi ubhodle umoya mzukulu, libuyele empilweni yenu enhle lomkakho.
Ngenzeni ngomkami othanda abafazi?
Ngithemba uziphilele Khulu. Ngingumama oleminyaka engu-30 ngendile njalo ngilabantwana ababili. Uhlupho lwami yikuthi umkami uthanda abafazi. Khulu uthandana labomama ababili lami sengize ngifuna ukuzidingela indoda engingathandana layo. Khulu ngenzeni? Kangifuni ukwenza lokhu kodwa ngibona sengathi angabona lami sengikwenza azwe ubuhlungu yikho okuzamenza akwekele.
Impendulo
Kanti mzukulu, ubona kungaba kuhle ukuba umuzi wenu uphenduke ube ngumhlambi kazelusile nje, lapho wonke umuntu owenza akufisayo na? Nxa kulento ongayizwisisiyo ngomunye wakho, hlalani phansi likhulumisane hatshi ukubuyisela ububi ngobubi. Kungaba kuhle nxa ungadinga njalo omunye wesihlobo esiseduze umlandisele uhlupho lwakho, laye futhi ayehlala phansi lomkakho ambonise ngobutshapha obungaka. Mzukulu, phandle lapha kugcwele imikhuhlane eminengi evelela emacansini, pho lingacaka lonke lingaba lakho ukutshiya ingane zenu zizintandane. Khulumisanani lomkakho futhi uzwe insolo yakhe emenza abelitshapha elingaka lizame ukulungisa ngenkulumo, lakhe umuzi wenu uqine. Ungakhangeli eceleni mzukulu yakha umuzi wakho uqine sibili.
Ubaba engizwana laye uyanginenga ngemibuzo engapheliyo
Ngingumama olabantwana ababili, njalo ngehlukana lomkami isicino sami silomnyaka owodwa. Umntanami eseleminyaka emibili ngaqala ukuthandana lenye indoda elomntanayo kusukela ngomnyaka ka-2013 kuze kufike khathesi. Khulu konke bekuhamba kahle, kodwa izinto seziguqukile, ubaba lo ufuna ukwazi okunengi lokunye engibona sengathi akuqakathekanga. Kwezinye izikhathi uyangibuza ukuthi sengathandana lamadoda amangaki, kunye lokuthi kuyini okwangehlukanisa lomkami. Khulu kambe kuqakathekile yini lokhu? Luthando kumbe ngidlala amadlwane lendoda le? Khulu sengikhathele ngalubaba, kayipheli iviki engazange angibuze ngembali yami kodwa mina kangikaze ngimbuze imbuzo yonke le. Ngeluleka Khulu, kumbe ungitshele ukuthi ngingamtshela njani ukuthi akwekele lokhu ngoba kungephula umoya.
Impendulo
Isintu sithi kakukuhlanga ukuphanda amangcwaba, kanti yena ufunani emangcwabeni, kuthiwa kayilale ngenxeba konke esikwenze izolo, ezweni lobunyama lobumpumputhe uThixo wasixolela mzukulu, laye kakhohlwe yikho konke akhe impilo entsha phezu kwesisekelo sezithembiso zenu lobabili. Lawe umbonise ngelipholileyo njalo ngothando ukuba amangcwaba kawuthandi kuwemba, wena usubheke yena yedwa njengentaba yakho yaseZion lapho okuzavela khona usizo lwakho lwenjabulo yakho yasemhlabeni. Mbonise ukuba izolo liyembelwa phela.
Umntanami uhlala enwaya njalonje
Ngithemba uphile kahle emzimbeni Khulu. Ngilomntwana olomnyaka lengxenye uhlupho ule-eczema. Sengizame lokhu lalokhu kodwa uhlala enwaya njalo nje kuyamphazamisa lasekulaleni ebusuku. Khulu okwenza angavuki yikuthi ngimfake ibele emlonyeni. Nxa ngingafakanga ibele uyavuka akhale. Uhlupho lwami lusekuthini bengifisa ukumekelisa ukumunya ekupheleni kwayonale inyanga kodwa okungikhathazayo yikuthi uzakwenelisa yini ukulala kumbe uzahle angihluphe. Ngicela ungincede, ngingamenzani ukuthi angalunywa.
Impendulo
Ngiziphilele mzukulu. Ubuhlungu umkhuhlane wokwenwaya kumele liyebona odokotela, ubachasisele ngohlupho lolo lonke. Lokhu yinto efuna isibhedlela mzukulu wami ukuze usize umntanakho.
