uMthunywa
INDLEKO zemali ebhadalwa kuzifundo zeCaf A sezitshiphile ngakho akulasizatho sokuthi abaqeqetshi bakuleli bezivalele phandle, kutsho uOmega Sibanda umsekeli kamgcinisihlalo weZimbabwe Football Association.
Kusukela kulisizini umqeqetshi ongela sithupha sikaCaf A angeke avunyelwe ukuthi akhuze iqembu eligijima kuPremier Soccer League (PSL). Isinqumo lesi sibambezela inengi labaqeqetshi abakhona kumaqembu akuligi le, okutsho ukuthi inkokheli zamathimu la sekumele ziqhatshe abaqeqetshi abatsha.
USibanda uyisikhulu seHigh Performance Committee, iqula lenkokheli zenguqu ezilomlandu wokubona ngobungcwethi babaqeqetshi.
Inkuthazo ephuma kukhomithi le ekhokhelwa nguSibanda igcizelela ukuthi sekuyisikhathi sokuthi abaqeqetshi batshelwe zigcwale ngokuthi kumele bakhuthalele ukuphenduka ekilasini bakhuphukise ulwazi lwabo.
USibanda uthe imali ekhitshwa kukhosi kaCaf A ibiza i$900 kusiya ku$1 000.
“Kuminyaka emithathu edluleyo amaqembu akithi wonke atshelwa ukuthi sekumele alandele isinqumo esivela kuFifa esibizwa ngokuthi yiClub Licensing. Isinqumo lesi samenyezelwa kuzo zonke inhlanganiso zebhola ezingaphansi kweCaf njalo. Lokho kutsho ukuba abaqeqetshi bamaqembu akuPSL alomqeqetshi omkhulu olesithupha sikaCaf A.
“Umqeqetshi okuligi kaDivision One, kumele aphathe isithupha sikaCaf B. Isinqumo lesi asitshintshi loba sekutheni.
Wonke amathimu adlala ibhola eZimbabwe atshelwa lokhu. Kusukela kulisizini, bonke abaqeqetshi bePremiership bazaphatha uCaf A.”
Umsekeli kamongameli weZifa lo uthe izifundo lezi sezehlisiwe imbhadalo.
“Kudala abaqeqetshi bebekhupha imali engange $2 000 ukufundela isithupha sikaCaf A. Khathesi, ngemva kokungena kobukhokheli bukamongameli uPhilip Chiyangwa kuZifa, abaqeqetshi sebekhipha i$900 kusiya ku$1 000 kuphela.”
Inhlanganiso yeZifa isihlele njalo ikomithi ebizwa ngokuthi yiFirst Instance Board ezatshutshisa ukuthi kudingisiswe ukuthi akulaqembu elizayephula umthetho.
Ngokutsho kukaSibanda, abaqeqetshi bazathi beqeda ukuthola isithupha sikaCaf A, bazaphakamisa ulwazi lwabo kuhlandla leProfessional Licence, edume ngokuthi yiProLicence.
“Lonyaka sizaletha isithupha esitsha okuthiwa yiProLicence. Isithupha lesi senziwa yilabo asebephethe uCaf A.
“Nxa abaqeqetshi bezimisele sibili ngokuziphakamisa, abakwazi ukuthi yini efunekayo. Injongo ngeyokuthi sivuselele inguqu yethu. Konke lokhu kwenzelwa ukuthi ibhola lethu liphakame.”
USibanda wengezelele ngokuthi amaqembu aphatheka kumqhudelwano yeCaf, iChampions League leConfederation Cup, azakubona ukuqakatheka kokuba labaqeqetshi abafundileyo.
“Abaqeqetshi bethu abathathele ithuba leli phezulu. Kulebhodi ebizwa ngokuthi yiFirst Instance Board ezabona ukuthi isinqumo lesi silandelwa ngokugcweleyo,” kutsho uSibanda.
