uMthunywa
ISIKHULU se-Orlando Pirates, uFloyd Mbele, siphosele abadlali beZimnyama ingqobe yokuthi inqobe kunkezo yeNedbank Cup, ehamba letikiti lokuyadlala kuCaf Confederation Cup.
Aziyihambeli kahle izinto iPirates kuPremier Soccer League (PSL). Leli qembu selivele lilahlekelwe yinkezo yeMTN 8 leTelkom Knockout. KuMTN 8 ehamba lomvuzo we-R8 miliyoni, iBucs iwatshiswe ijesi yi-Ajax Cape Town nge 1-0 .
KuTelkom, iPirates ikhitshwe yiKaizer Chiefs kuma-semi final, sekukhahlelwa imbekwa, e-FNB Stadium, eSoweto, eGoli. IBucs iphinde yagileka komunye umqhugelwano.
KuCaf Confederation Cup, leli qembu lithelwe amanzi yi-Etoile du Sahel yaseTunisia.
Kodwa uMbele usalethemba.
“Iqembu elifana lePirates laziwa ngokuwina izicoco. Abalandeli bethu bahlale bakhangelele ukuthi siwine ngaso sonke isikhathi. Kulisizini sesilahlekelwe yizicoco ezintathu kodwa ithuba lisekhona.
“Sisazodlala kuNedbank Cup sikhangele ukuthi siyinqobe. Zonke izicoco esidlala kuzo sihlale sikhangelele ukuzinqoba, futhi awukho umehluko lakuNedbank Cup,” kutsho uMbele.
Ngesizini edluleyo iPirates iqede ilambatha, ayizange iwine lesisodwa isicoco kwezintathu ezikhona.
“Ngesizini edluleyo asizange siwine lutho ngakho sizimisele ukuqeda isizini sithwele okuthile. Ukufinyelela kwethu ku-final yeConfederation Cup kutshengisa ukuthi iqembu lethu lingenza ngcono. “Siyethemba ukuthi ukubuya kwabadlali abamqoka kuzokwenza umehluko eqenjini ukuze sikwazi ukuthola isicoco,” kutsho uMbele. — Ubulembu
