uMthunywa
Gladmore Ncube
KUNGABA yiFC Platinum kumbe iDynamos!
Ngemva kweminyaka yokuphosela imali ezwayo kubadlali bayo, iqembu leFC Platinum lingabe libhekane lenjabulo kulimpelaviki.
Iligi yeCastle Lager ingena kumidlalo yayo yokucina kulimpelaviki lapho okuzakuba yimpi kudingwa yona ezakuba yintshantshu. Inkezo yeCastle le isilwela ngamaqembu amabili iDynamos leFC Platinum.
Umqeqetshi weqembu lePlatinum FC uNorman Mapeza usezame ukuyinamathela inkezo le okweminyaka kodwa kusehlula. Ngempelaviki ukhangelane lenhlanhla ngoba ngoMgqibelo anganqoba iChapungu leqembu lakhe lingene emalini.
Sebekhulumile abalandeli bathi iPlatinum izanqoba ngoba iphezulu ngemiklomelo engu-69 okutsho ukuthi iChapungu ingavuzisa izangena amanzi izimbamgodi zingahle zithathe inkezo.
IDeMbare yona ihleli kunombolo yesibili ile-67. Layo isendleleni yokuba yintshantshu. Ebuzwa ngecebo lakhe lokunqoba, uMapeza uthe akulindwe elangoMgqibelo.
“Hatshi, angifuni ukukhuluma ilanga lingakafiki. Akulindwe impelaviki sibone ukuthi singakhuluma njani,” kutsho lumqeqetshi ngoLwesithathu emini.
Kubalandeli benguqu kungaba ngcono ukuthi inkezo yeCastle Lager ithathwe yiFC Platinum. Isizatho yikuthi iqembu leli lidlale inguqu ephezulu lokuthi selibengumzekeliso omuhle wendlela amaqembu okumele akhokhelwe ngayo.
Kusenjalo, inguqu kaDivision One kumhlubulo ongezansi yelizwe isithe amhlophe kuqembu leBulwayo Chiefs. Ithimu le yiyo ezakuya kuligi ephakemeyo ngo-2018.
Ngempelaviki itshove enye inguqu engafuni mfana omncane yathatha inkezo yeJoshua Mqabuko Nkomo Invitional Cup ngoMgqibelo owedluleyo.
Ukudlala kwabo kuhle kwenze iqembu lathola imizuzo emihle kakhulu enjengemali ezakwenza ukuthi iqembu liphumelele. UFortune Nkomazana walithela emambuleni iqembu laphiwa umvuzo wenkezo yeTrukumb Mining Enterprises kanye le$2 400.
Umqeqetshi weChiefs, uThulani Sibanda uyajabula ukuthi abafana badlale kuhle kodwa khathesi sikhangelele ukuthi asebenze nzima ukuze imidlalo le ebuyayo yeJohn Landa Nkomo Memorial Cup. IChiefs izadlala leBosso 90 kuma-semi finals ngakho abafana kumele babambe ziqine.
“Ngizwa intokozo enkulu kakhulu ngoba abafana batshove ngamandla abo wonke bathatha inkezo yeJoshua Mqabuko Nkomo Cup. Laloba sithokoza akumelanga sikhohlwe ukuthi kulomdlalo omkhulu obuyayo ngakho ke abadlali kumele basebenze nzima.
“Njengoba nje sizadibana leBosso 90 kumele sihambe sibophe zaqina ngoba liqembu eliqinileyo ngakho ke lathi sifuna ukubangena ngezinye abangazaziyo sinqobe ngoba sifuna ukuyaphambli.
“Ngendlela engibona abadlali besebenza ngayo ngezake utsho ukuthi ngabantu abavela thatha inkezo elomvuzo omkhulu wemali. Lokhu kuyangijabulisa ngoba kuyatshengisa ukuthi bengasebenza ngendlela le bazangena bazanqoba.
“Sesinqobe inkezo ezimbili lonyaka khathesi sisebenza nzima ukuthi sithole inkezo yesithathu ukwenzela ukuthi umnyaka usiphelele kuhle ukwenzela ukuthi ngomnyaka ozayo abafana bangene kwezinkulu bekwazi okokudlalela.”
