Sokudinga umkhuleko kuTsholotsho FC

13 Aug, 2015 - 08:08 0 Views
Sokudinga umkhuleko kuTsholotsho FC ULizwe Sweswe

uMthunywa

YiNtatheli kaMthunywa
UKUNGENA kweTsholotsho FC kuligi ephakemeyo iPSL kungaphenduka kube yisiqalekiso nanko phela sekungathi iqembu leli lidinga umkhuleko ukuze liqhubekele phambili litshibilika kuligi ngomnyaka ozayo.

Iqembu leli lihlezi ngenxeba kunombolo yetshumi  lambili okutsho ukuba kumele lenze ngcono kumidlalo eseleyo.

Lanxa nje ekhona amathuba okuthi iqembu leli lisinde, lingaxegisa lingayadlala ezikwakweni.

Umqeqetshi waleliqembu uLizwe Sweswe usalandula ukuthi iqembu lakhe seliphumile kuPSL.

“Sisesekhona kuPSL  lanxa nje ukwehluleka ukunqoba kwethu sokusuke kwasigaxa ijogwe elinzima. Sizalwela imiklomelo engu-24 ezasenza siphunyuke singayi ezikwakweni. Kumele sidlale umdlalo wethu wansuku zonke,” kutsho uSweswe.

Uqhubeke wathi: “Asidlalanga kuhle ngoba iqembu belingasebenzisi amathuba alo okuhlohla. NjengeTsholotsho kukhona esenelise ukukwenza kungakho sizitshayela ihlombe. Senelise ukuthuthukisa abadlali abancane abanengi.”

Kungumbono wabacubunguli benguqu kulumhlubulo ukuthi nxa iqembu leZiqholo zeZhwane lingaya emahlangeni kulabadlali abakhanya bengeke balandela ithimu.

Okubisela iqembu leli emuva yikuthi kulabadlali bayo abathi loba belobungcitshi bayaphuza ukudlulisa ibhola enyaweni.

Abalandeli bethimu le balokhe befake ithemba kuSweswe. Kuyisifiso sabalandeli ukuthi ithimu le ingaphumi kuPSL njengoba kulamaqembu amalutshwane adlala kuliligi. Amanye amaqembu akumhlubulo ongezansi yelizwe abalisa iHwange, Highlanders, How Mine, leChicken Inn. Ukuphuma kweTsholotsho FC kutsho ukuba inani lamaqembu la lizehla.

USweswe uthe angeke kwenzakale ngoba akhona amaqembu asengozini ukwedlula elakhe.

“Thina sikhona kuPSL kuze kuyovalwa. Ngomnyaka ozayo sizatshintsha ukwenza, sidlalele ukuthi sincintise yona inkezo yeligi,” nguSweswe lo ezinika isibindi.

Isimo selogu okwamanje siveza ukuthi amathimu abalisa iBuffaloes, iFlame Lily leDongo Sawmills aseduzane lokuvalelisa. Kusukela kuthimu ekunombolo yetshumi lanye iZPC.

Share This:

Sponsored Links

Survey


We value your opinion! Take a moment to complete our survey
<div class="survey-button-container" style="margin-left: -104px!important;"><a style="background-color: #da0000; position: fixed; color: #ffffff; transform: translateY(96%); text-decoration: none; padding: 12px 24px; border: none; border-radius: 4px;" href="https://www.surveymonkey.com/r/JRD3VTT" target="blank">Take Survey</a></div>

This will close in 20 seconds