uMthunywa
YiNtatheli kaMthunywa
PHAKATHI kukaMadinda Ndlovu loJoey Antipas ukhona ozaphuma esenwaya ikhanda ekupheleni komdlalo eBarbourfields.
IHighlanders leChicken Inn zizatshiya ubuhlobo bokwakhelana edolobheni linye lamuhla kulumdlalo weligi yeCastle Lager weviki lamatshumi amabili lane.
Abaqeqetshi bobabili badinga ukuziphakamisa njengenkunzi zenguqu koBulawayo. Kumbali yokudlala kwamaqembu la, iHighlanders isikhokhele kweminengi loba nje kusaziwa ukuthi iChicken Inn ka-Antipas ibingalahli ithawulo.
Ngokukhangeleka kwesimo samaqembu la, iChicken Inn ilethuba elihle lokuyibhaxabula iHighlanders.
Akusimfihlo ukuba ekaMadinda le iyaqhula kulezinsuku nanko phela iyehluleka ukubhoboza igedi.
UMadinda ungena kulumdlalo inhliziyo ilukhuni ngamaphutha enziwa ngabadlali bakhe. Kumdlalo odluleyo bedibene le-Nichrut, abadlali beBosso baqede umdlalo bengutshiki lobhanqa 0-0 kumdlalo lapho okusebenze khona unozinti uAriel Sibanda ovimbe igedi.
Enkambeni yeChicken Inn abadlali bayazethemba ngoba bavela nqoba iqembu elethusayo nxa lisekhaya iShabanie Mine nge 3-0.
UMadinda useqede amahola edlulisileyo engakaze abone abadlali bakhe behlohla amabhola ayedlula amabili.
Ekhuluma loMthunywa ngemva kokulolonga abadlali kuliviki, uAntipas ubikele uMthunywa ecingweni ukuthi angeke kwenze ukuthi adliwe yiHighlanders.
“Sihlonipha wonke amaqembu njalo leHighlanders ngiyibona iliqembu eliqinileyo kodwa angeke ngivume ukuthi basinqobe,” kutsho umqeqetshi lo.
Umqeqetshi lo uthe ngokuqina abayikho, abadlali bakhe bazenza imbali lonyaka ngokukutula amathimu aziwa ngokuthi azinkunzi zeligi.
Imidlalo yeCastle Lager PSL ngempelaviki:
NgoMgqibelo: Herentals v Chapungu (Rufaro), FC Platinum v Bulawayo Chiefs (Mandava)
NgeSonto: Shabanie Mine v Highlanders (Maglas), Dynamos v Caps United (Rufaro), Triangle v Bulawayo City (Gibbo), Mutare City Rovers v Ngezi Platinum (Vengere), Chicken Inn v ZPC Kariba (Luveve), Black Rhinos v Harare City (National Sports Stadium)
